21.12.2016 / 10:33

СМІ даведаліся пра званок Абамы ў Маскву па гарачай лініі праз хакерскія напады 3

Напярэдадні выбараў Абама выкарыстаў экстраную сувязь, каб запатрабаваць ад Расеі спыніць кібератакі і не ўмешвацца ў выбарчы працэс. У Белым доме лічаць, што гэтыя меры спрацавалі.

У кастрычніку адміністрацыя прэзідэнта ЗША Барака Абамы скарысталася гарачай лініяй паміж Масквой і Вашынгтонам — так званым чырвоным тэлефонам, каб папярэдзіць Расею аб сур'ёзных наступствах умяшання ў прэзідэнцкія выбары ў ЗША. Пра гэта паведамляе NBC News са спасылкай на высокапастаўленага амерыканскага чыноўніка.

Па словах суразмоўцы тэлеканала, такім чынам улады ЗША вырашылі падкрэсліць значнасць папярэджання, зробленага Абамам раней, у верасні, падчас саміту G20 у Кітаі. Аднак на гэты раз амерыканскі прэзідэнт ужыў словы «ўзброены канфлікт», падкрэсліла крыніца.

«Міжнароднае права, уключаючы законы, якія датычацца ўзброеных канфліктаў, распаўсюджваецца і на дзеянні ў кіберпрасторы. Мы будзем ацэньваць дзеянні Расеі, зыходзячы з дадзеных стандартаў», — гаварылася ў пасланні, адпраўленым Абамам 31 кастрычніка.

Факт выкарыстання Абамам «чырвонага тэлефона» пацвердзіў таксама прадстаўнік Белага дома. Адказваючы на пытанне, ці спрацавалі гэтыя меры, ён сказаў: «Паглядзіце на вынікі. У дзень выбараў нічога не здарылася — значыць, гэта спрацавала».

Як адзначае NBC, «чырвоны тэлефон» — гэта сістэма для экстранай сувязі, якая выкарыстоўваецца ў моманты крызісных сітуацый, такіх як тэракты 11 верасня або ўварванне ЗША ў Ірак. Гэтая сістэма ніколі не ўяўляла сабой тэлефоннай лініі ў літаральным сэнсе, і ў сваім цяперашнім выглядзе яна прызначана для адпраўкі e-mail. NBC таксама падкрэслівае, што адміністрацыя Абамы раней ні разу не выкарыстоўвала гэты тып сувязі.

На мінулым тыдні The New York Times пісала, што амэрыканскія спецслужбы на працягу чатырох месяцаў прапаноўвалі Абаме розныя варыянты адказу на атакі расійскіх хакераў, аднак усе яны былі адхіленыя. Як адзначала выданне, Абама праявіў сваю звычайную асцярожнасць, палічыўшы, што лепш зусім не выкарыстоўваць кіберсродкі, чым выкарыстоўваць іх неэфектыўна.

Раней тэлеканал NBC News са спасылкай на высокапастаўленыя крыніцы ў амерыканскай выведцы паведамляў, што прэзідэнт Расіі Уладзімір Пуцін мог асабіста кіраваць тым, як дадзеныя, скрадзеныя ў дэмакратаў, прасочваліся ў прэсу.

У Крамлі назвалі версію аб асабістым удзеле Пуціна ў «таямнічай расійскай кампаніі» «смешнай лухтой», якая не мае пад сабой ніякіх падстаў.

У пятніцу, 16 снежня, памочнік Пуціна Юрый Ушакоў заявіў, што падчас сустрэчы з Абамам на саміце G20 расійскі лідар даў «выразны адказ» на абвінавачванні ва ўмяшанні Расіі ў амерыканскія выбары. «З нашага боку быў дадзены вельмі выразны адказ, які, можа быць, не ўпісваўся ў тое, што нам спрабаваў растлумачыць Абама», — сказаў Ушакоў, адзначыўшы, што гутарка вялася тэт-а-тэт.

Масква неаднаразова адхіляла абвінавачванні ва ўмяшанні ў выбары прэзідэнта ЗША і сваю магчымую датычнасьць да кібератак на камп'ютарныя сеткі дэмакратаў.

2
Аанатоль / Адказаць
21.12.2016 / 11:09
С огнем играют
4
Якуб Лапатка / Адказаць
21.12.2016 / 11:45
Амерыканскія спецслужбы хай спачатку ліквідуюць пагрозу чалавецтву ў вызглядзе нямаведама куды зніклай ядзернай зброі Саддама. Недзе ж яна схаваняа і чакае свайго злавеснага часу нам на пагібель. Абама з клінтаніхай прадулі выбары, дык цяпер у іх і Пуцін, і Асад, і іранскія аяталы, і хакеры з пранкерамі -- усе вінаватыя, апрача іх саміх. Разрабаваная, раскрадзеная Расія, у якой касмічныя дэталі вырабляюцца ў стайнях ды хлявах, кіруе светам? Пуцін -- прэзідэнт Зямлі? Вось назначыў Трампа, а зараз яшчэ і меркеліху здыме з пасады.Не страшна?
1
Олег / Адказаць
22.12.2016 / 20:45
Если это правда, то Путин просто красавец!!!
Каб пакінуць каментар, калі ласка, актывуйце JavaScript у наладах свайго браўзеру