Грузія адклікае свайго пасла з Расеі для кансультацый у сувязі з апошнімі падзеямі ў зоне канфлікту.

Заява МЗС Грузіі зьявілася празь некалькі гадзін пасьля таго, як Расея прызнала факт палёту самалётаў расейскіх ВПС над тэрыторыяй Паўднёвай Асеціі.

Масква заявіла, што гэта было зроблена для таго, каб разрадзіць сытуацыю ў рэгіёне грузінска‑паўднёваасецінскага канфлікту.

Грузія лічыць, што тым самым Расея парушыла паветраную прастору краіны.


Міхаіл Саакашвілі

Паводле грузінскага боку, амаль 40 хвілін чатыры ваенныя самалёты лёталі над тэрыторыяй на поўнач ад Цхінвалі.

Прэзыдэнт Міхаіл Саакашвілі заявіў, што «Грузія жадае нармальных і ўзаемавыгадных дачыненьняў з Расеяй», але не дапусьціць пасягальніцтва на сваю бясьпеку.

У Тбілісі з афіцыйным візытам знаходзіцца дзяржсакратар ЗША Кандаліза Райс, якая прыляцела сюды ў тым ліку і для таго, каб абмеркаваць пытаньне непрызнаных рэспублік.

На прэс‑канфэрэнцыі ў Тбілісі Райс заклікала Расею «стаць бокам, які ўдзельнічае ў разьвязаньні праблемы, але не садзейнічае ёй».

Паводле Бі-Бі-Сі