Фота Святланы Курэйчык, Млын.by.
Ігумення Cвята-Ксеніеўскага жаночага манастыра матушка Васіліса была забітая ў вёсцы Барань Барысаўскага раёна 5 студзеня.
Як паведамілі ва ўпраўленні Следчага камітэта па Мінскай вобласці, па факце забойства ігуменні распачатая справа. У дачыненні да падазраванай прызначаная псіхолага-псіхіятрычная экспертыза.
Паводле інфармацыі Барысаўскай епархіі Беларускай праваслаўнай царквы, у нападзе на ігуменню Свята-Ксеніеўскага жаночага манастыра матухну Васілісу падазраецца 29-гадовая грамадзянка Беларусі, ураджэнка Казахстана, якая жыве пры манастыры. Яе часова прытулілі там, жадаючы дапамагчы ў вырашэнні жыццёвых праблем. «На працягу яе знаходжання ў манастыры, асабліва напярэдадні таго, што здарылася, адзначалася псіхічнае расстройства маладой жанчыны, якое і стала прычынай яе страшнага ўчынку», — паведаміла прэс-служба епархіі.
Як кажуць жыхары Барані, падазраваная была хроснай дачкой ігуменні.
Развітанне з памерлай адбудзецца 8 студзеня.
Ігумення Васіліса (Мядзведзь) нарадзілася 10 сакавіка 1949 года ў горадзе Сосніца Чарнігаўскай вобласці (Украіна). Была прыхаджанкай Петра-Паўлаўскага сабора ў Мінску, затым пасля ўтварэння Елізавецінскага сястрынства пры саборы стала сястрой міласэрнасці. У 2001 годзе служыла паслушніцай Свята-Елісавецінскага жаночага манастыра пад Мінскам, потым прыняла пострыг. З 2004 года з дабраславення мітрапаліта Мінскага і Слуцкага Філарэта, патрыяршага экзарха ўсяе Беларусі, — ігумення Свята-Ксеніеўскага жаночага манастыра ў вёсцы Барань Барысаўскага раёна.
Падазраваная ў забойстве ігуменні манастыра ў Барысаўскім раёне затрыманая
У МУС удакладнілі грамадзянства падазраванай у забойстве ігуменні
