Упраўленнем Следчага камітэта па Гродзенскай вобласці на падставе матэрыялаў праверкі, праведзенай упраўленнем па барацьбе з эканамічнымі злачынствамі УУС Гродзенскага аблвыканкама, распачата крымінальная справа ў дачыненні да службовай асобы ААТ «Гродзенскі мясакамбінат» і кіраўніка прыватнага гандлёвага ўнітарнага прадпрыемства Гродна па факце крадзяжу шляхам злоўжывання службовымі паўнамоцтвамі, здзейсненага ў асабліва буйным памеры (ч. 4 арт. 210 Крымінальнага кодэкса Рэспублікі Беларусь), паведамляе прэс-служба Следчага камітэта.
Яны падазраюцца ў тым, што з 2013 па 2016 гады праз створанае для крадзяжоў прыватнае гандлёвае ўнітарнае прадпрыемства праводзілі закупку для патрэб мясакамбіната па заведама завышаных цэнах таварна-матэрыяльных каштоўнасцяў. У выніку супрацьпраўных дзеянняў завалодалі грашовымі сродкамі мясакамбіната ў суме каля 83 тысяч рублёў.
З санкцыі пракурора да службовых асобаў прыменена мера стрымання ў выглядзе заключэння пад варту. У мэтах забеспячэння кампенсацыі нанесенай шкоды накладзены арышт на іх маёмасць, у тым ліку на нерухомасць і аўтатранспартныя сродкі.
У мэтах ўстанаўлення фактычных абставінаў здзяйснення злачынства на абодвух прадпрыемствах запланавана правядзенне фінансавых праверак, канфіскавана і вывучаецца фінансава-гаспадарчая і дагаворная дакументацыя, дапытваюцца кіраўнікі і работнікі прадпрыемстваў, праводзяцца іншыя следчыя і працэсуальныя дзеянні.
Расследаванне працягваецца.
