01.02.2017 / 20:19

«Мотаршоу» сёлета праводзіцца не будзе 2

Беларускія аўтадылеры прынялі рашэнне адмовіцца ад правядзення ў 2017 годзе ў Мінску міжнароднага аўтамабільнага салона «Мотаршоу». Пра гэта 1 лютага на прэс-канферэнцыі ў Мінску паведамілі члены праўлення Беларускай аўтамабільнай асацыяцыі (БАА), якая аб'ядноўвае дылераў і імпарцёраў аўтамабіляў.

Яны патлумачылі, што гэта рашэнне — следства агульнай сітуацыі на аўтамабільным рынку і ў эканоміцы краіны ў цэлым. «Мы хацелі б правесці аўтасалон у гэтым годзе, нават праводзілі ўнутры асацыяцыі апытанне, але прыйшлі да высновы, што ўсяго толькі сем удзельнікаў — гэта ўжо будзе не «Мотаршоу». На рынку цяпер актыўна прадаюцца сем-дзесяць брэндаў, дылеры, якія прадаюць мала, фінансава не змогуць сабе дазволіць зрабіць добры стэнд. Больш за тое, нават тыя, хто сёння добра прадае машыны, у большасці сваёй адчуваюць фінансавыя цяжкасці ў сілу вялікай закрэдытаванасці, бягучых выдаткаў і гэтак далей», — сказаў старшыня праўлення БАА Сяргей Міхневіч.

У кіраўніцтве асацыяцыі звяртаюць увагу, што за некалькі апошніх гадоў шмат якія беларускія дылеры пабудавалі прыгожыя аўтацэнтры, а гэта велізарная фінансавая нагрузка.

«Акрамя таго, «Мотаршоу» заўсёды ўяўляла сабой свята, і нам не хацелася б праводзіць яго ў нейкім урэзаным бюджэтным варыянце. Нам хочацца вярнуцца да ранейшага фармату свята, калі будуць фінансавыя перадумовы і аптымізм на рынку», — дапоўніў Міхневіч.

«Мы аптымістычна глядзім на магчымасць правядзення «Мотаршоу» ў 2018 годзе, як мяркуецца, гэта будзе ў маі. За гады свайго правядзення «Мотаршоу» набыло пэўны статус, і рабіць яго цяпер у нейкім кастрыраваным выглядзе мы не будзем», — сказаў Дзмітрый Ярота — кіраўнік кампаніі «Рэмарк», якая традыцыйна з'яўляецца арганізатарам «Мотаршоу».

Апошні раз выстава «Мотаршоу» працавала ў Беларусі ў 2013 годзе, і тады месцам яе правядзення ўпершыню быў абраны канькабежны стадыён «Мінск-Арэны». Свае стэнды прадставілі 24 аўтамабільныя маркі. Усяго на выставе было размешчана каля 200 аўтамабіляў. Паводле звестак арганізатараў, яе наведала амаль 65 тысяч чалавек.

0
Филин / Адказаць
02.02.2017 / 08:17
И зря, покупка нового авто процесс длительный. Клиент зреет. Поливать надо постоянно и освещать не переставая. Французские и российские авто отличная тема выставки, " избиение немецкого автопрома автомобилями союзников в первую мировую". Соберут всех потенциальных клиентов.
0
Піліп / Адказаць
08.02.2017 / 00:17
Не будзе і няхай так.. машыны для беларусаў сення не актуальная рэч, калі пытанне стаіць выжыванне нацыі... наш народ паважае коней, можа хай як альтэрнатыва хай коневыставу наладзіць і цікава і змястоўна, прыгожыя пародыстыя і не толькі коні...старыя брычкі... плугі... драбіны... і новае штосьці... народ дакладна пойдзе паглядзець...
Каб пакінуць каментар, калі ласка, актывуйце JavaScript у наладах свайго браўзеру