Новы міністр ўнутранай бяспекі ЗША Джон Келі заявіў, што сцяна на мяжы з Мексікай, узвядзенне якой было адным з перадвыбарных абяцанняў Дональда Трампа, будзе пабудавана на працягу двух гадоў.

Getty Images

У інтэрв'ю тэлеканалу Fox News Келі заявіў, што будаўніцтва сцяны плануецца пачаць цягам бліжэйшых месяцаў. Паводле яго слоў, ён чакае, што спачатку яе фрагменты ўзвядуць на найбольш праблемных участках мяжы, а затым гэтыя фрагменты злучаць, піша Бі-бі-сі.

Адначасова Келі не выключыў, што ў некаторых месцах сцяна будзе фактычна віртуальнай — замест фізічнай перашкоды там як мінімум на першым часе будуць выкарыстоўвацца высокатэхналагічныя прылады сачэння за мяжой.

Паводле слоў Келі, сродкі на ўзвядзенне сцяны паступяць ужо ў самы бліжэйшы час. Аднак міністр не стаў удакладняць, адкуль канкрэтна і ў якіх аб'ёмах будуць выдзелены грошы. Сам Трамп абяцаў, што будаўніцтва сцяны аплаціць Мексіка — але тая ўжо адмовілася.

Хочаш падзяліцца важнай інфармацыяй ананімна і канфідэнцыйна?