12 лютага ў вялікай канцэртнай залі Беларускай дзяржаўнай філармоніі пройдзе ўрачысты канцэрт, прысвечаны 500-годдзю беларускай Бібліі і беларускага кнігадрукавання, а таксама 500-годдзю рэфармацыі ў Еўропе.
На канцэрце ўпершыню ў Беларусі прагучаць адкрыцці музыкі Рэнесанса і ранняга Барока, а таксама самыя яркія фрагменты шэдэўраў Высокага Барока — Пасіёнаў паводле Мацвея і Яна, Месы сі-мінор вялікага Баха і араторыі «Месія» Гендэля.
Акрамя таго, загучыць і Берасцейскі канцыянал — першы ў Беларусі друкаваны нотны зборнік, ажно 1558 года! Вы пачуеце псальмы, якія 450 гадоў таму спявалі нашыя продкі ў кальвінскіх зборах, і між іншым — слаўны Мікалай Радзівіл Чорны: менавіта ён быў фундатарарам Канцыянала.
У праграме — выступленне дзяржаўнага камернага хору Рэспублікі Беларусь пад кіраўніцтвам заслужанай артысткі Беларусі Наталлі Міхайлавай, ансамбля салістаў «Вытокі», камернага аркестра «Capella Academia».
У 2017 годзе спаўняецца 500 год з дня, калі Францыск Скарына ўпершыню надрукаваў беларускую кнігу. Не выпадкова, што першай надрукаванай кнігай па-беларуску стаў біблейскі «Псалтыр». Акурат у 1517 годзе ў самой Еўропе распачаўся магутнейшы рух Рэфармацыі, збудаваны на аўтарытэце Святога пісання. Менавіта гэтым двум падзеям і прысвечаны будучы канцэрт.
Аўтар гэтага праекта і дырыжор — лаўрэат міжнародных конкурсаў Аляксей Фралоў. Пачатак — 19.00. Квіткі даступныя ў касах філармоніі і ў білетных аператараў.
