Указ аб скарачэнні дзяржслужачых сваёй адміністрацыі на 30% падпісаў 13 лютага Аляксандр Лукашэнка.Дакумент прыняты «ў мэтах удасканалення дзейнасці Адміністрацыі прэзідэнта Беларусі, аптымізацыі яе структуры і колькасці», паведаміла прэс-служба прэзідэнта.
president.gov.by
Указам зацверджаны ў новай рэдакцыі палажэнне аб Адміністрацыі прэзідэнта і яе структура, а таксама палажэнні аб памочніку прэзідэнта і прэс-сакратары.
«Актуалізавалі функцыі і паўнамоцтвы Адміністрацыі Прэзідэнта Новая структура дазволіць забяспечыць эфектыўнасць далейшай працы гэтага дзяржоргана ва ўмовах скарачэння колькасці яго работнікаў», — адзначаецца ў рэлізе.
Рэфармуецца інстытут памочнікаў прэзідэнта, ўводзяцца дзве новыя пасады памочнікаў прэзідэнта. Яго ўзаемадзеянне з заканадаўчай і судовай галінамі ўлады будзе забяспечвацца памочнікам па пытаннях заканадаўчай і судовай дзейнасці, а кантроль выканання даручэнняў па пытаннях дзейнасці банкаў і нябанкаўскіх крэдытна-фінансавых арганізацый — памочнікам па пытаннях развіцця фінансава-крэдытнай сістэмы.
Новым палажэннем аб прэс-сакратары прэзідэнта прадугледжваецца «значнае пашырэнне функцый і паўнамоцтваў прэс-сакратара, у тым ліку па каардынацыі дзейнасці найважнейшых дзяржаўных сродкаў масавай інфармацыі».
Указ набывае моц 1 мая 2017 года.
Аб скарачэнні Адміністрацыі прэзідэнта гаворка ішла на нарадзе ў Лукашэнкі 6 лютага. «Будзе скарочана каля 30% дзяржаўных служачых, якія працуюць у Адміністрацыі прэзідэнта. Структура адміністрацыі невялікая — гэта 108 дзяржслужачых у той новай штатнай колькасці, якую мы сёння прапанавалі», — заявіла тады кіраўнік АП Наталля Качанава. Паводле яе слоў, гэта першы крок у працы па скарачэнні штатнай колькасці дзяржаўных органаў па ўсёй краіне. «Гэтай жа працай сёння займаюцца і ўрад, і ўсе рэспубліканскія органы кіравання. Цяпер ужо адпрацоўваецца ўказ па аптымізацыі, дзе будзе вызначаны і працэнт скарачэння для ўсіх астатніх дзяржустаноў, рэспубліканскіх і мясцовых органаў улады», — сказала Качанава.
У той жа час пытанне аб аптымізацыі на ўзроўні мясцовых органаў улады пакуль застаецца адкрытым: урад прапаноўвае не чапаць колькасць рай- і гарвыканкамаў.
