 Ілюстрацыя з vpteam.net |
Крымінальная справа па ч. 2 арт. 209 Крымінальнага кодэкса (махлярства) распачата Першамайскім РУУС Мінска ў дачыненні да жыхара Брэста, затрыманага ў сталіцы 18 ліпеня.
Як паведаміла БелаПАН прэс-афіцэр раённага ўпраўлення міліцыі Наталля Аўласенка, мужчына называўся заможным мінчанам кілерам, паведамляў аб тым, што атрымаў на іх "заказ", і выказваў гатоўнасць адмовіцца ад яго выканання за 1.500 долараў. Пры гэтым абяцаў праз некалькі дзён даць дыск з інфармацыяй пра "заказчыка". Сваіх ахвяраў злачынца выбіраў мэтанакіравана: вывучаў у дварах аўтатранспарт, устанаўліваў уладальнікаў найбольш дарагіх аўтамашын і даведваўся ўсю неабходную інфармацыю пад рознымі прыстойнымі прычынамі ў суседзяў.
Некалькі пацярпелых звярнуліся ў міліцыю пасля таго, як "кілер" не з'явіўся праз некаторы час з дыскам. Прычым у адным выпадку ён атрымаў 1.500 долараў, у другім — толькі перадаплату ў 200 долараў за дыск з інфармацыяй пра заказчыка. Цяпер высвятляецца, хто яшчэ пацярпеў у выніку злачынных дзеянняў брэстаўчаніна, які ў красавіку вызваліўся з месцаў пазбаўлення волі, калі адбыў там сем гадоў за махлярства. Дарэчы, план сваіх дзеянняў пасля вызвалення махляр распрацаваў яшчэ ў калоніі.
Як зазначыла Н.Аўласенка, аналагічныя злачынствы рэгістраваліся з красавіка ў Брэсце і Гомелі.
