«Мы прывезлі і жывапісныя партрэты, і гравюры, і літаграфіі XIX стагоддзя, і медалі, ёсць два творы ткацтва — маката і слуцкі пояс, — распавядае куратар выставы — загадчыца аддзела старажытнабеларускага мастацтва Алена Карпенка. — Экспазіцыя носіць перш за ўсё пазнавальны характар, у ёй сабраны творы мастацтва рознага мастацкага ўзроўню. Многія партрэты ствараліся сябрамі сям'і ці прадстаўнікамі роду. Але вядома, што для Радзівілаў працавалі і буйныя мастакі. На выставе, напрыклад, прадстаўлены партрэт рукі Францыска Ксаверыя Лампі».
Экспанаты размешчаны ў храналагічным парадку, пры гэтым улічаныя сваяцкія сувязі княскага роду. Каб разабрацца ў іх, можна звярнуцца да генеалагічнага дрэва Радзівілаў, якое таксама прадстаўлена на выставе.
«Адзін з унікальных экспанатаў — пахавальны партрэт Караля Станіслава Радзівіла, — кажа куратар. — У свой час кожны саркафаг у крыпце касцёла Божага Цела ў Нясвіжы ўпрыгожваў падобны партрэт. Саркафагаў захавалася каля 70. Падобных партрэтаў на тэрыторыі Беларусі ўсяго два. Адзін у нас, а другі ў Слонімскім раённым краязнаўчым музеі, але ён адносіцца да роду Пацаў».
Творы з княжацкай калекцыі дапаўняюць кнігі з бібліятэкі Радзівілаў і дакументы, прадастаўленыя Нацыянальнай бібліятэкай Беларусі і гістарычным архівам. Таксама на выставе можна ўбачыць партрэты з музейнага збору.
«Пастаянная экспазіцыя радзівілаўскіх партрэтаў існуе з моманту адкрыцця мастацкага музея, — тлумачыць Алена Карпенка. — Адразу іх было літаральна два-тры. Мы ўвесь час пашыралі калекцыю. У 2006-м адкрылі найбуйнейшую пастаянную экспазіцыю, куды ўвайшло каля 30 партрэтаў. Потым часова перадалі на экспанаванне 17 твораў у Нясвіжскі замак. Цяпер яны ўсе вярнуліся. Пасля закрыцця часовай выставы царкоўнага мастацтва «Свет нябесны на зямлі» радзівілаўскія партрэты вернуцца ў пастаянную экспазіцыю».
Князь Мацей Мікалай Радзівіл 27 лютага прыедзе ў Мінск, каб асабіста пазнаёміць наведвальнікаў Нацыянальнага мастацкага музея са сваёй калекцыяй твораў. У Мінску яе будуць дэманстраваць да 16 красавіка.
