Кіраўнік МЗС Расіі Сяргей Лаўроў заявіў, што РФ не здыме санкцыі з краін Еўрасаюза да поўнага выканання мінскіх пагадненняў, якія рэгламентуюць мірнае ўрэгуляванне канфлікту ў Данбасе, паведамляе Newsru.com.
Scanpix
Лаўроў сказаў аб гэтым з трыбуны Мюнхенскай канферэнцыі па бяспецы — аднаго з прадстаўнічых еўрапейскіх форумаў, дзе да яго выступілі канцлер Германіі Ангела Меркель і віцэ-прэзідэнт ЗША Майк Пенс. Пры гэтым Меркель казала аб неабходнасці супрацоўнічаць з Расіяй, а Пенс — аб адказнасці РФ за ўзброены канфлікт на ўсходзе Украіны. Лаўроў запэўніў, што Расія нацэленая на выкананне мінскіх пагадненняў.
«Мы таксама хочам, каб мінскія дамоўленасці выконваліся. І мы сваіх санкцый не здымем з Еўрасаюза, пакуль мінскія дамоўленасці не будуць выкананыя. Гэта таксама трэба разумець» — цытуе кіраўніка МЗС агенцтва ТАСС.
«Адносна санкцый я ўжо выказваўся наконт таго, наколькі ў цэлым нелагічна і штучна гучыць формула: мінскія дамоўленасці павінны быць выкананыя Расіяй, і тады ЕС здыме санкцыі», — адзначыў ён.
У той жа час Лаўроў падкрэсліў, што аднаўленне кантролю Кіева над мяжой з Расіяй магчымае толькі пасля выканання мінскіх пагадненняў. У цяперашні час некаторыя прапускныя пункты кантралююцца сепаратыстамі «ДНР» і «ЛНР». У Кіеве раней заяўлялі, што кантроль над мяжой павінен быць перададзены ўкраінскай пагранслужбе да таго, як у «асобных раёнах Данбаса» будуць праведзеныя выбары. Кіраўнік МЗС назваў пазіцыю Расіі «сумленнай» і выказаў надзею на пераадоленне рознагалоссяў: «Паглядзім, як далей пойдзе наш дыялог з Еўрасаюзам і НАТА. У нас пазіцыя ўпэўненая і абапіраецца на сумленныя выкладкі, якімі мы дзелімся з нашымі калегамі. Калі яны захочуць гэты штучна створаны канфрантацыйны этап пераадолець, гэта ў іх сілах».
Таксама Лаўроў выказаўся за аднаўленне ваенных кантактаў з Паўночнаатлантычным альянсам: «Для таго, каб асцярогі і падазрэнні здымаць, трэба аднавіць ваеннае супрацоўніцтва… (генеральны Сакратар НАТА) Енс Столтэнберг у асяроддзі сваіх намеснікаў учора не змог сказаць, што ў НАТА да гэтага ўжо гатовыя. Гэта сумна, таму што без практычнага супрацоўніцтва любыя сустрэчы дыпламатаў ніякага дададзенага сэнсу не будуць мець, у тым, што тычыцца вырашэння праблем бяспекі».
Лаўроў таксама нагадаў аб словах Меркель, якая заклікала абмеркаваць кібербяспеку ў рамках Рады РФ-НАТА. «Сёння канцлер Меркель — мы загаварылі аб кібербяспецы — вылучыла вельмі цікавую думку аб тым, што Рада РФ-НАТА павінна была б заняцца гэтай праблемай… Калі цяпер канцлер Германіі — аднаго з вядучых сяброў НАТА — выступае за тое, каб НАТА займалася кібербяспекай, я зыходжу з таго, што, па меншай меры, Берлін хоча, каб РРН аднавіла паўнавартаснае функцыянаванне, а не проста абмежавалася дыскусіямі», - паведаміў Лаўроў.
