Суд Цэнтральнага раёна Гомеля пастанавіў спыніць разгляд грамадзянскай справы супраць падатку на дармаедства — «з прычыны непадведамаснасці». Тым часам камісія, створаная пры гарвыканкаме, вызваліла Аляксандра Сямёнава, які падаў у суд на падатковую, ад выплаты збору. Больш таго, яму прапанавалі працу, піша Tut.by.
Леанід Судаленка, прававы інспектар незалежнага прафсаюза РЭП і прадстаўнік Аляксандра Сямёнава, пракаментаваў навіну аб вызваленні ад збору наступным чынам:
— Ці можна казаць пра перамогу? Думаю, рана. Сваёй перамогай, мы будзем лічыць толькі поўную адмену дэкрэта. Ніякія кропкавыя вызваленні ўжо не могуць паўплываць на настроі людзей. У гарвыканкаме вызвалілі аднаго, а за маёй спінай яшчэ 420 тысяч стаіць у цэлым па краіне і 80 тысяч у Гомельскай вобласці. Усе гэтыя людзі прызнаныя дармаедамі. Наступны падасць пазоў у суд, і што ўлады будуць рабіць з наступным, таксама вызваляць?
Сам Сямёнаў пакуль не кажа, ці пагодзіцца на новую працу. Яму прапанавалі быць вартаўніком у трэсце № 14.
Сёння на суд прыйшло яшчэ больш людзей, чым у першы раз. Аднак працэс праходзіў усё ў той жа зале, хоць яго ўдзельнікі прасілі перанесці суд у памяшканне пабольш. Частка тых, хто прыйшоў, засталася на ганку — падчас пасяджэння людзі выкрыквалі лозунгі аб адмене дэкрэта № 3.
Неўзабаве суд абвясціў перапынак, каб вынесці рашэнне па справе. І пастанавіў: спыніць разгляд «з прычыны непадведамаснасці». Пошліну, якую заплаціў Сямёнаў, вернуць.
Нагадаем, часова беспрацоўны гамяльчук Аляксандр Сямёнаў меў намер даказаць, што збор на фінансаванне дзяржвыдаткаў, які ад яго патрабавалі, незаконны.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню27
Каментары