23.02.2017 / 18:23

Ля Курапатаў прайшоў масавы збор мясцовых жыхароў ФОТА 39

Канфлікт вакол пабудовы бізнэс-цэнтра ў Зялёным Лузе каля Курапатаў набірае абароты. Учора адзін з абаронцаў Курапатаў быў затрыманы, сёння ўначы на ўдзельнікаў акцыі напалі невядомыя. На 18:00 быў анансаваны вялікі сход мясцовых жыхароў, якія сабраліся абмеркаваць сітуацыю вакол будоўлі.

18:00

Пакуль жыхары збіраюцца, будаўнікі хуценька заканчваюць зашываць будоўлю высокім металічным плотам. Адна з мясцовых жыхарак скардзіцца: бадзяліся п'яныя рабочыя, іх толькі прыбралі адсюль.

Жыхары ўжо сабралі 600 подпісаў пад зваротам супраць будоўлі. Паперу накіравалі ў пракуратуру і Палату прадстаўнікоў.

Тым часам «лагер» пратэстоўцаў павялічыўся, стаяць ужо два намёты, ляжаць паддоны.

18:05

На зборы прыкладна паўсотні чалавек разам з журналістамі. Сярод прысутных — Павел Севярынец, Зміцер Дашкевіч, Алесь Лагвінец, Аляксей Янукевіч, Антон Матолька. 

«Нашы ўнукі падрастуць і будуць у гэтае казіно бегаць», — абураюцца бабулі, ківаючы на будоўлю.

«Нашае патрабаванне — гэтую будоўлю спыніць!» — кажа Севярынец. Яго падтрымліваюць апладысментамі. Таксама ён заклікаў пайсці 1 сакавіка на прыём да кіраўніка Мінгарвыканкама Андрэя Шорца. 

18:10

Актывісты кажуць, што заяву ў міліцыі наконт ранішняга нападу ў іх прынялі.

Алесь Кіркевіч, якога раніцай ударылі па галаве, таксама прысутнічае на зборы. 

18:15

Людзей ужо больш за сотню.

18:20

Мясцовыя жыхары працягваюць збор подпісаў супраць будоўлі.

18:30

Выступае мясцовая жыхарка. Кажа, з чатырох дамоў сабралі 800 подпісаў. Жыхары абураюцца дэпутатам Сокалам, які не рэагуе на патрабаванні выбарцаў: «Яны ўсе вельмі хутка забываюць, хто іх выбраў».

18:40

Рабочыя зашылі ўсё, павесілі пашпарт аб'екта — рабочы дзень скончаны. Сыходзяць бягом, людзі крычаць ім «ганьба!». 

18:50

Выступы скончыліся, народ паціху разыходзіцца. Пастанавілі, што подпісы перададуць уладам. Зміцер Дашкевіч заявіў, што, нягледзячы на ранішнія падзеі, актывісты і сёння будуць ночыць у намётах. «Выставім пасты», — дадаў ён. 

Улад Швядовіч

3
Вася / Адказаць
23.02.2017 / 18:25
Наша возьме
2
Русафоб непамяркоуны, Змагар, Свядомы, Пан, Беларус -ту / Адказаць
23.02.2017 / 18:30
Паведамце, што патрэбна хлопцам. Не рашыскай нечысцi на беларускай зямлi. Гэты гмах будзе знесены , а усе хто давау дазвол на яго узвядзенне, i такзваны гаспадар будуць сядзець . Няхай нават не мараць, што кара iх мiне
2
Мікола))) / Адказаць
23.02.2017 / 18:36
на сайце 1863x.com ёсьць вельмі цікавы артыкул-"дасье" пра таго, хто будуе ў Курапатах бізнэс-цэнтар
Паказаць усе каментары/ 39 /
Каб пакінуць каментар, калі ласка, актывуйце JavaScript у наладах свайго браўзеру