Варшаўскі суд будзе разглядаць пазоў арганізацыі па барацьбе з паклёпам на Польшчу і польскі народ супраць Facebook, паведамляе Радыё Польшча.
Акруговы суд у Варшаве пастанавіў, што пазоў супраць амерыканскай кампаніі Facebook па факце дыскрымінацыі па палітычных і рэлігійных перакананнях будзе разглядацца ў мясцовым судзе.
Пазоў аб магчымым здзяйсненні злачынства кампаніяй Facebook быў пададзены ў снежні 2016 года фондам «Рэдут у абарону добрага імя — Польская ліга процідзеяння дыфамацыі». Арганізацыя сцвярджае, што Facebook блакуе інфармацыю, ужываючы крытэрыі, якія ўключаюць нацыянальную прыналежнасць, палітычныя і рэлігійныя погляды, абмяжоўвае свабоду камунікацыі і годнасці. Разам з гэтым Facebook распаўсюджвае забароненую ў Польшчы таталітарную камуністычную сімволіку.
«Facebook са штаб-кватэрай у ЗША і Ірландыі будзе несці адказнасць за парушэнне заканадаўства і Канстытуцыі краіны, у якой яна працуе», — адзначыла прадстаўнік Польскай лігі процідзеяння дыфамацыі Уршуля Вуйцік.
