26.07.2008 / 18:13

Забрыць у аграномы! "Складваецца няпростая сытуацыя з забеспячэньнем вёскі аграрыямі" 5

Аграрная нарада на Берасьцейшчыне нагадала мне савецкі анэкдот. «Што будзе, калі ўсталяваць камунізм у Сахары?» — «Дэфіцыт пяску». Піша ў сваім блогу Аляксандар Класкоўскі.

Аграрная нарада, што прайшла 25 ліпеня на Берасьцейшчыне, нагадала мне савецкі анэкдот. "Што будзе, калі ўсталяваць камунізм у Сахары?" — "Дэфіцыт пяску".

У нас жа, як паведамляе ўрадавае агенцтва, "складваецца няпростая сытуацыя з кадравым забеспячэньнем вёскі аграрыямі…".

Чаму аграрыі ня хочуць у вёску — гэта пытанне кшталту: чаму рыба ня хоча жыць у вадзе?

Столькі грошай увалілі ў тое "адраджэньне вёскі" — а зь яе рвуць кіпці пры першай магчымасьці.

Са слоў кіраўніка дзяржавы, на рэалізацыю праграмы адраджэньня вёскі цягам 2005—2007 гадоў накіравана блізу Br46 трлн., або 125% да прадугледжанага аб'ёму фінансаваньня. Разам з тым, за тры гады прырост сельгаспрадукцыі склаў толькі 12,2% пры заданьні 21-27%. Недададзена каля 1,3 млн.т збожжа, столькі ж бульбы, болей за 60 тыс.т ільновалакна.

Карацей, колькі ні сьпявай дыфірамбаў той праграме, няўзброеным вокам бачна, што дзяржаўная напампоўка аграрнай галіны грашыма не дае належнага эфэкту.

Дарэчы, хто патлумачыць, што ў гэтым выпадку маецца на ўвазе пад адраджэньнем? Да якой гістарычнай рысы ідзе ўяўная храналагічная адкрутка? Калі вёска квітнела і дыхала вольна? Мо' пры калгасах? Ці за часамі прыгону?

© bymedia.net

Зрэшты, што калгас, што прыгон — розьніца невялікая. І ўлада, здаецца, наважылася аднавіць элементы прыгону. Іначай як патлумачыць словы афіцыйнага лідэра: "Паступіў у ВНУ — ведаў, куды ішоў. І проста адпрацаваць і некуды пайсці ня будзе дазволена. Мы гэта юрыдычна замацуем".

Таксама было заяўлена, што "малады спецыяліст, накіраваны паводле размеркаваньня, без дазволу старшыні раённага або абласнога выканкаму ня зможа перайсьці на іншае месца працы".

Вось табе, бабуля, і Юр'еў дзень!

Цікава, а калі напужаная моладзь увогуле не захоча ісьці ў сельгасВНУ? Рэкрутаваць давядзецца, мусіць. Забрываць ілбы — і на 25 гадоў. Ці ўсталёўваць усеагульную аграрную павіннасьць. І гэта мы ўжо праходзілі за савецкім часам, калі прафэсуру гналі на базы перабіраць гнілую гародніну.

Заключнымі акордамі нарады сталі загады, калі пачынаць і калі сканчаць жніво. Рэжым ручнога кіраваньня сельскай гаспадаркай нікуды не падзеўся.

Што ж да нарошчваньня экспарту прадуктаў на тле "галодных бунтаў па ўсім сьвеце", то незалежныя эканамісты кажуць, што трэба яшчэ разабрацца, ці ёсьць тая выгада. Бо калі ўлічыць, колькі датацый ідзе нашаму аграрнаму сэктару, дык ці не атрымліваецца, што мы ў рэшце рэшт субсідуем замежнага спажыўца?

Са слоў Леаніда Злотнікава, вываз ў Расею ялавічыны, птушкі, яек, масла ўвогуле стратны. Сабекошт кіляграму ялавічыны, напрыклад, дзесяць тысяч рублёў, а расейцам прадаем па шэсьць. "То бок, беларуская сельская гаспадарка застаецца неэфэктыўнай", — кажа экспэрт.

Хочаш падзяліцца важнай інфармацыяй ананімна і канфідэнцыйна?

Аляксандар КЛАСКОЎСКІ

0
Узрэцкі / Адказаць
26.07.2008 / 19:25
Горадам вёска ня будзе НІКОЛІ ( і ня трэба мусіць) Якія б побытавыя умовы там не рабілі, усё роўна лягчэй штаны праціраць на офісе (+ выходныя , адпачынак) , чым пасяўныя/уборачныя у самы сезон... Можа калі б вяскоўцам даць якія прывілеі: напр. насіць зброю (калі ок з цвярозасцю), толькі для іх збіраць грыбы/ягады, рыбу лавіць - мо й хто і паедзе... Хаця - катэджы даюць, а ўсё роўна усе пруцца у годад у шпакоўні...
0
Scooter / Адказаць
27.07.2008 / 01:34
"Паступіў у ВНУ — ведаў, куды ішоў. І проста адпрацаваць і некуды пайсці ня будзе дазволена. Мы гэта юрыдычна замацуем". Таксама было заяўлена, што "малады спецыяліст, накіраваны паводле размеркаваньня, без дазволу старшыні раённага або абласнога выканкаму ня зможа перайсьці на іншае месца працы". --нават ня ведаю, гэта такая "наіўная" саўковая рэфлексія на масавую працоўную эміграцыю беларусаў за мяжу (перш за ўсё ў расею), або наадварот, сьвядомы запалох людзей прыгонам, каб тыя яшчэ з большым імпэтам эмігравалі ў тую ж расею. Няўмольна набліжаецца чарговая "прэзыдэнцкая" кампанія, і для станоўчага вырашэньня "Галоўнага Кадравага Пытаньня" расея патрабуе ў мясцовага рэжыма ўсё больш і больш актываў Беларусі, ў тым ліку і рабсілы. Што рэжым сваёй "палітыкай" пасьпяхова і робіць. Прычым ведаючы ўсю саўковасьць мясцовых "кіраўнічкоў", Маскве нават не патрэбна ў яўнай форме аддаваць ім загады - рэжым цудоўна і прадказальна па-саўковаму рэфлексуе на падзеі. Вось і тут - рэжым раптам "озабоцілся" "нехваткой кадров" (няма каму працаваць => менш прадукту і адпаведна менш грошай з усімі выцякаючымі), і адрэагаваў у лепшых традыцыях саўка. Што прывядзе да яшчэ большай працоўнай эміграцыі, перш за ўсё ў расею (бо мяжы няма). Застаецца толькі адно пытаньне - рэжым гэтак робіць таму што ня ўмее кіраваць інакш, або ён проста тупа адпрацоўвае ў расеі сваю прывідную ўладу?...
0
дуб / Адказаць
27.07.2008 / 07:37
А у офiсе так сама трэба працаваць. Гарэлачкi не пап\'еш дужа, у 8 ранiцы трэба быць на працы, у запой ня пойдзеш. I пасля працы трэба, калi-некалi застацца. А вёсьцы у лiпенi - верасьнi працы шмат, затое зiмой яе мала. А у занядбаных СВК (калгасах) улетку яшчэ можна зарабiць. А у лiстападзе - сакавiку няма заробкау. Вось i рвуць кiпцi у горад. Куды пайшлi тыя грошы, якiя выдзялялiся на веску, думаю, зразумела. Катэджы? Бачыу я тыя катэджы! Там, каб давесьцi да ладу, трэба на рамонт аддаць шалёныя грошы. А дзе iх узяць у занядбаным СВК. I каму на весцы выдаваць зброю. Спачатку застрэляць кiраунiка СВК, а потым перастраляюць адзiн аднаго ад добрага жыцьця. Тады аграрыi зьнiкнуць увогуле.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру