03.03.2017 / 14:29

Мэр Cветлагорска, сын у «Беларусьнафце»: пяць фактаў пра звольненага Аляксандра Якабсона архіўны матэрыял 11

Сёння Аляксандр Лукашэнка звольніў свайго памочніка па Мінску Аляксандра Якабсона. «Наша Ніва» сабрала цікавыя факты пра адстаўнога чыноўніка.

Карэнны гамяльчук

Якабсону 65 гадоў, ён нарадзіўся ў Гомелі. Кажуць, што ў добрым гуморы нават мог расказаць пра жыццё на роднай вуліцы Лазневая Алея (цяпер ужо проста Лазневая). Потым вучыўся ў Беларускім інстытуце інжынераў чыгуначнага транспарта. Своеасаблівая кузня кадраў — адтуль выйшлі былы прэм’ер-міністр Сяргей Сідорскі, былы старшыня КДБ Леанід Ерын, міністр транспарту Анатоль Сівак. Адразу па сканчэнні ВНУ Якабсон накіраваўся на будаўніцтва Кандалакшскага марскога гандлёвага порту ў савецкае Запаляр’е (Мурманская вобласць).

Ён некалькі разоў прызнаваў, што як гарадскі жыхар не заўсёды разумеў спецыфіку працы на вёсцы і сутыкаўся з сельскагаспадарчай прадукцыяй толькі на ўзроўні гатовага тавару. Таму перш-наперш на пасадзе старшыні Гомельскага аблвыканкама ён занурыўся ў вывучэнне сельскай гаспадаркі.

Кіраўнік «СНІДагорска»

Так у пачатку 1990-х часта называлі горад Светлагорск. Аляксандр Якабсон на працягу 11 гадоў узначальваў мясцовы гарвыканкам (1986—1996). «Гэты час я ўспамінаю з асаблівым трапятаннем. Там адбывалася маё сталенне, гэтыя гады я лічу найлепшымі ў сваім жыцці», — узгадваў Аляксандр Серафімавіч.

Малады горад Светлагорск, якому на той час не было і трыццаці гадоў (раней на гэтым месцы была вёска Шацілкі) стаў цэнтрам беларускай наркаманіі. У горадзе дзейнічалі хімічны завод, электрастанцыя, кардонны камбінат. Амаль не было прыватнага сектара. Людзі прыязджалі з розных канцоў СССР. Лічбы 1996 года казалі, што ў Светлагорску жыло амаль 800 ВІЧ-інфікаваных.

Якабсон, натуральна, спрабаваў разганяць мясцовыя прытоны, але не заўсёды ўдавалася. Дарэчы, у намесніках Якабсона ў Светлагорску быў Уладзімір Патупчык, які цяпер займае пасаду міністра энергетыкі.

Наступнік Вайцянкова

У 2001 годзе Аляксандр Якабсон узначаліў Гомельскі аблвыканкам. Узначаліў пасля любімага ў народзе кіраўніка Мікалая Вайцянкова. Таго самага Вайцянкова, які не проста не падтрымаў Лукашэнку на выбарах 1994 года, але і нават адмовіўся сустрэцца з такім кандыдатам у прэзідэнты. Пасля Чарнобыля Вайцянкоў быў сярод тых, хто рабіў усё, каб абараняць людзей ад дурных загадаў з Масквы і Мінска. Тысячы людзей яму за гэта асабіста ўдзячныя.

Таму Якабсону было няпроста заставацца на ўзроўні папярэдніка. Кажуць, што ў працоўным кабінеце Якабсона доўгі час быў толькі стол і шафа. Толькі ў апошні год кіравання кабінет значна павялічылі, усталявалі душавую кабінку, новую мэблю. «Мае самапавагу і сваю пазіцыю, зразумела, у рамках сістэмы», — кажуць пра яго гамельчукі.

Збольшага водгукі пра Якабсона як пра звычайнага выканаўцу, а не пра творчага работніка. Некалькі разоў ён пазбягаў сустрэчаў з еўрапейскім інвестарамі, абы чаго не выйшла. Сам Гомель Якабсон зрабіў дагледжаным, а вось па вобласці (асабліва ў заражаных радыяцыяй раёнах) заставаліся пытанні.

Пострах чыноўнікаў

Амаль чатыры гады Аляксандр Якабсон працаваў на пасадзе старшыні КДК. З гэтай пасады ён мог наводзіць страх на сотні арганізацый і установаў краіны. Не дай Бог дашлюць праверку!

Калі Лукашэнка прамаўляў «іменем рэвалюцыі», то наступная фраза найчасцей накіроўвалася да Якабсона, каб ягонае ведамства разабралася з парушэннямі, безгаспадарлівасцю і неахайнасцю. У рабочых паездках кіраўніка дзяржавы Якабсон заўсёды быў дзесьці па правую ці левую руку.

Зрэшты, не заўсёды быў у фаворы. Па выніках працы па мадэрнізацыі «Барысаўдрэва» Якабсон атрымаў строгую вымову. Зрэшты, іншыя страцілі пасады і нават волю.

Часам Якабсон выступаў у ролі рэфарматара. Напрыклад, прапаноўваў перавесці Мінскі аблвыканкам у Заслаўе, а абітурыентам прапаноўваў здаваць чатыры экзамены замест трох цяперашніх. А вось падчас валютнага крызісу 2011 года не знайшоўся сказаць нічога іншага, апроч: «Тут трэба штосьці рабіць».

Сын у «Беларуснафце»

У 2014 годзе ў Аляксандра Якабсона памерла жонка, Галіна Калатухіна.

Сын Аляксандра Серафімавіча Тарас Якабсон займае пасаду дырэктара «Беларуснафта-Нафтахімпраект», раней ён узначальваў Мінскае абласное аддзяленне кампаніі.

Зміцер Панкавец

7
Светлагорскі / Адказаць
03.03.2017 / 16:34
Колькі можна ўжо падымаць і сароміць імя гэтага горада! ! ! Ёсць і гарады як Светлагорск але вы маўчыце пра іх. Калі пішаш пра Якабсона, то навошта рабіць акцэнт і каверкаць назву горада!!!
4
Sha / Адказаць
03.03.2017 / 18:17
И не веска, а местечко Шацилки
7
Андрей / Адказаць
03.03.2017 / 19:35
Кто ты такой, панковец, чтобы вторить недоумкам 90-х и называть мой город "СПИДогорском"?
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру