У Івацэвіцкім раёне высвятляюць прычыны гібелі рыбы, паведаміў БЕЛТА намеснік начальніка Брэсцкай абласной інспекцыі аховы жывёльнага і расліннага свету Сяргей Штык.
Тут і ніжэй фота з сацыяльных сетак
Гібель рыбы зафіксаваная на канале Агінскага паблізу вёскі Выганашчы. Загінулая рыба знаходзілася на вызваленай ад лёду акваторыі плошчай каля 1 тыс. кв. м і ў берагавой лініі. Усяго інспектары выявілі 300 асобін плоткі, 150 асобін ляшча і 50 — печкура памерамі 5-10 см з прыкметамі раскладання.
Пры аглядзе іншых участкаў канала і аб'яднаных з ім каналаў меліярацыйнай сеткі загінулай рыбы, заморных або перадзаморных з'яў не выяўлена — гэтак жа, як і бачных крыніц забруджвання.
Рыбалоўныя ўгоддзі знаходзяцца ў карыстанні нацыянальнага парку «Белавежская пушча». Прамысловых прадпрыемстваў, сельскагаспадарчых арганізацый, іншых аб'ектаў, якія маглі б з'явіцца патэнцыяльнымі крыніцамі забруджвання, на працягласці ўсяго канала ад яго вытока з возера Выганашчанскае да месца здарэння на адлегласці каля 10 км не маецца.
Для выяўлення прычын здарэння былі адабраныя ўзоры загінулай рыбы і дастаўленыя ў Івацэвіцкую раённую ветэрынарную службу. Каб вызначыць наяўнасць забруджвальных рэчываў і ступень забруджвання паверхневых вод у месцы здарэння, накіраваная заяўка ў Рэспубліканскі цэнтр аналітычнага кантролю ў галіне аховы навакольнага асяроддзя для адбору пробаў вады і правядзення неабходных даследаванняў.
Праца па выяўленні прычын гібелі рыбы працягваецца.
