Галоўны рэдактар газеты Адміністрацыі прэзідэнта «Советская Белоруссія» Павел Якубовіч запрасіў на сустрэчу таксіста, актывіста нацыянальнага руху Леаніда Кулакова.
Спадар Кулакоў не першы месяц спрабуе абскардзіць адміністрацыйнае рашэнне за арышт на 3 сутак у дзень парламенцкіх выбараў 11 верасня 2016 года. Спадар Леанід быў адным з назіральнікаў ад кампаніі «Права выбару» па 108-ай Каліноўскай выбарчай акрузе.
Пасля закрыцця выбарчага ўчастку Кулакоў сеў на лаву пад’есці, як у хуткім часе да яго падбегла міліцыя, затрымалі, правяралі на ўжыванне алкаголя, але ўсё паказвала па нулях. Тым не менш, гэта не перашкодзіла на сайце ГУУС змясціць матэрыял, што ў крыві Кулакова было 1 праміле алкаголю.
У хуткім часе ў «СБ» выйшла публікацыя «Кепская гісторыя», дзе пераказваецца гісторыя з алкаголем. Судзілі ж Кулакова па артыкуле 23.4 «Супраціў міліцыі», а не за распіццё алкаголя.
«Павел Якубовіч прызнаў, што публікацыя на сайце ГУУС была фальсіфікацыяй. Спачатку яны пісалі пра 1 праміле, потым паправілі на 0,5. Але ж я быў цалкам цвярозы! Згадзіўся, што браць інфармацыю без пераправеркі небяспечна. Была абвешчана вымова журналісту, што пісаў гэтую нататку», — расказаў «НН» Леанід Кулакоў.
Павел Якубовіч папрасіў прабачэнні за гэтую публікацыю, а таксама паабяцаў змясціць пісьмовае абвяржэнне. «Я папрасіў невялікую матэрыяльную кампенсацыю — падпіску на год на «Народную волю». На што рэдактар прапанаваў мне напісаць ліст у рэдакцыю аб сітуацыі, а на ганарар зрабіць, што захачу».
Агулам сустрэча Леаніда Кулакова і Паўла Якубовіча доўжылася каля 3 гадзін. Вельмі шмат размаўлялі пра Курапаты. «Рэдактар «СБ» прызнае, што гэта месца рэпрэсій. І кожны мусіць скінуцца па капейцы на памятны знак у гэтым месцы», — расказаў Кулакоў.
