У Заводскім РУУСе, дзе знаходзіліся нашыя журналісты ў часе затрымання, яны налічылі каля 200 чалавек.
Па інфармацыі праваабаронцаў-вясноўцаў, у Маскоўскім РУУСе на дадзены момант знаходзяцца каля 120 чалавек, у Цэнтральным — каля 30—50 чалавек.
Больш за 120 чалавек трапіла ў Першамайскі РУУС, людзям не даюць карыстацца тэлефонамі.
Блізу 200 чалавек трапілі ў міліцыю Савецкага раёна Мінска. Ленінскі РУУС прыняў больш за 100. Фрунзенскі — каля ста чалавек.
Такім чынам, 25 сакавіка ў Мінску было затрымана найменей 900 чалавек.
Яшчэ 300 чалавек былі рэпрэсаваныя ў сакавіку за папярэднія акцыі пратэсту або затрыманыя прэвентыўна. Супраць 26 распачатыя крымінальныя справы — так званая «Справа Белага легіёна».
Па стане на 18:30 людзей вялікімі групамі пачалі выпускаць з міліцыі усіх раёнаў Мінска без складання пратаколу. Некаторых на машынах адвозяць далей ад пастарунка.
Паводле нашай інфармацыі, некалькі чалавек шпіталізавана з траўмамі галавы.
