Сенат ЗША ратыфікаваў дагавор аб пашырэнні НАТА і ўступленні ў альянс Чарнагорыі. За ўступленне Чарнагорыі прагаласавалі 97 амерыканскіх сенатараў, супраць - двое, перадае Асашыэйтэд прэс.
Сенатар ад штата Кентукі Рэнд Пол прагаласаваў супраць. Ён патлумачыў, што асцерагаецца абвастрэння адносін з Расіяй і нават вайны з ёй.
Раней Чарнагорыя была саюзнікам Расіі, а цяпер знаходзіцца ў цэнтры супрацьстаяння Расіі і краін Захаду за ўплыў на Балканах, піша Асашыэйтэд прэс.
Дзяржсакратар ЗША Рэкс Тылерсан прасіў сенатараў як мага хутчэй ухваліць уступленне Чарнагорыі ў НАТА — да саміту кіраўнікоў дзяржаў — членаў альянсу, які пройдзе ў канцы мая ў Брусэлі.
Уступленне Чарнагорыі ў НАТА падтрымаў і прэзідэнт ЗША Дональд Трамп, які зараз павінен афіцыйна ўхваліць гэтае рашэнне.