Мінскі абласны суд вынес прысуд экс-кіраўніку Дзяржынскага раёна Уладзіміру Ткачову, які жорстка забіў былую жонку. Абвінавачанага прысудзілі да 20 гадоў калоніі строгага рэжыму. Раней родныя ахвяры распавядалі, што на целе забітай эксперты налічылі 44 нажавыя раненні, піша Tut.by.
Фота: Дар'я Буракіна, TUT.BY
Экс-кіраўніку Дзяржынскага раёна Уладзіміру Ткачову 67 гадоў. Па яго просьбе пасяджэнне вялося ў закрытым рэжыме.
Яго судзілі па ч. 1 арт. 154 (Катаванне), ч. 2 арт. 377 (Крадзеж і ўтойванне афіцыйных дакументаў, учыненыя з асабістых памкненняў, якія пацягнулі цяжкія наступствы), ст. 186 (Пагроза забойствам), п. 6 ч. 2 арт. 139 Крымінальнага кодэкса (Забойства, учыненае з асаблівай жорсткасцю). Санкцыя апошняга з артыкулаў — аж да пажыццёвага зняволення або расстрэлу. Аднак з улікам узросту абвінавачанага смяротнае пакаранне яму не пагражала.
Суд прысудзіў Уладзіміра Ткачова да 20 гадоў у папраўчай калоніі строгага рэжыму. Па ч. 2 арт. 377 яго апраўдалі — віна даказаная не была. Аксане Базык, дачцэ загінулай, Ткачоў павінен выплаціць 30 тысяч рублёў.
Нагадаем, трагедыя, за якую судзілі Ткачова, адбылася ў жніўні 2016-га ў гандлёвым цэнтры Фаніпаля. Яго былая жонка Любоў Ткачова была індывідуальным прадпрымальнікам і трымала некалькі «кропак». Днём Уладзімір Ткачоў прыйшоў да яе ў буцік. Па словах абвінавачанага, паміж імі ўзнікла сварка, у час якой ён нанёс былой жонцы мноства нажавых ран.
Следчыя высветлілі: калі Ткачовы жылі разам, муж «сістэматычна катаваў жонку, наўмысна прычыняючы ёй боль і пакуты». А пасля таго, як яна пераехала, сцярог яе, праз пагрозы спрабаваў аднавіць адносіны. А каб Любоў Іванаўна не прадала дом, выкраў дакументы на ўласнасць.
Родныя Ткачовай сцвярджаюць: Любоў Іванаўна не раз звярталася ў міліцыю з заявамі на былога мужа, але яго так ніхто і не спыніў.
