Супрацоўнікі архіву ў паўднёвачэшскім горадзе Індржыхуў Градэц на запыт беларускіх гісторыкаў знайшлі ў сваім сховішчы два рукапісныя дакументы, датаваныя 1584 і 1590 гадамі. Абодва дакументы ўласнаручна падпісаныя сынам Францішка Скарыны Сымонам Русам з Полацка.
Два тыдні таму супрацоўнік Інстытута гісторыі Акадэміі навук Беларусі Алесь Жлутка і беларускі гісторык з Карлавага ўніверсітэта ў Празе Павел Котаў зрабілі запыт у архіў горада Індржыхуў Градэц з просьбай адшукаць дакументы, датычныя сына Францішка Скарыны Сымона.
Пра гэтыя дакументы раней было вядома, што яны існуюць, пра іх згадвалася ў адной з публікацый 1929 года, але самі яны і іх тэкст у навуковы абарот не ўводзіліся.
10 красавіка Павел Котаў атрымаў з архіву копіі абодвух дакументаў.
Гэта два арыгінальныя рукапісы, падпісаныя рукой Сымона Руса з Полацка. Мова ў дакументах ідзе пра дрэннае здароўе Сымона і адпраўку яго панам Адамам з Градца на курорт Добра Вода.
Архіў гораду Індржыхуў Градэц, які зьяўляецца філіялам Галоўнага абласнога архіву ў горадзе Тршэбань, даў дазвол на публікацыю абодвух дакументаў. Яны будуць уключаныя ў зборнік дакументаў пра жыццё і дзейнасць Францішка Скарыны, абноўленае выданне якога цяпер рыхтуецца ў Нацыянальнай акадэміі навук Беларусі.
