19.04.2017 / 15:06

«Можна паліваць гусей» — незвычайная аб'ява арэнды пакоя ўзрушыла беларускі інтэрнэт 12

Абвестка арэнды пакоя ў Калодзішчах, якую апублікаваў у фэйсбуку журналіст Дзяніс Зелянко, сабрала больш за тысячу лайкаў, ёй падзяліліся больш за 400 разоў. Калі вам не трэба пакой, можаце проста прачытаць гэта як цікавую публіцыстычна-маркетынгавую нататку.

Шукаем дзяўчынку або хлопчыка на падсяленне ў дом, Калодзішчы (4 км ад Мінска). Мы здаём 2-і паверх з пакоем на 17 м.кв.. У пакоі сценка-секцыя і раскладная канапа. Акрамя таго, у распараджэнні будзе пляцоўка перад пакоем і частка каморкі на другім паверсе. На першым паверсе — агульная вялікая кухня, звычайныя туалет-ванна. У пакоі ёсць дзверы, якія вядуць у другі недабудаваны пакой, але там толькі дошкі і тлен. Калі вы любіце абразную дошку ці сумаваць — забірайце ў даважку.

Прапанова падыдзе тым, хто не занадта патрабавальны да ўсякіх еўрарамонтаў, любіць прыроду (за плотам — бярэзнік і хвойны лясны масіў), катацца на ровары (ёсць кладоўка з асобным уваходам з вуліцы) і не баіцца добрага сабакі і гусей-індычак (птушкі занятыя разборкамі адна з адной і не ўяўляюць небяспекі, сабака дык увогуле толькі есць і спіць).

Можаце прынесці свайго ката ці курыцу (ёсць неўладкаваны певень). Вылучым месца пад агарод. На двары ёсць турнік, арэлі, альтанка (трэба разгрэбці з зімы). Ёсць шланг з вадой. Можна паліваць гусей (супакойвае).

Наш Вялікі Асноўны Певень (і маленькі рэзервовы) не дадуць вам праспаць на працу з раніцы — пачынаючы з 4.30 яны раўнамерна кукарэкаюць з інтэрвалам, усё як у вашым дзяцінстве ў бабулі! Зрэшты, калі трэба паспаць, то іх не заўважаеш.

Суседзі (гэта значыць, мы) — фатограф-журналіст і дырэктар (ка) эка-майстэрняў, і два дзіцяці (жывём, адпаведна, на першым паверсе). Усе не кураць і не п'юць, чакаем таго ж ад наймальніка.

Калі вы ўсё жыццё марылі памацаць цёплага гусака або навучыцца рабіць багоўку з кардона — гэта месца для вас.

Транспартная даступнасць — за плотам прыпынак аўтобуса да метро Уручча (20 хв.). 700 метраў да цэнтральнага скрыжавання пасёлка — там куча маршрутак і аўтобусаў да горада (уключаючы маю любімую 1547, якая за 1 (!) рубель вязе ад Калодзішчаў-Уручча праз увесь Мінск па праспекце ажно да Каржанеўскага кожныя 12 хвілін).

Ёсць wi-fi (byfly).

Каштуе гэта ўсё — як і пакой у горадзе (100$), але са сваімі плюшкамі.

***

Тут і далей — абнаўленне тэксту на аснове пытанняў, якія ўзніклі.

Сябры, тут ужо пытаюцца, колькі каштуе прыехаць і папаліваць гусей. Мяне гэта пытанне ўводзіць у замяшанне. Калі сядзіш за сваім букам і ў любы момант можаш надзець тапкі, узяць шланг і паліць парачку гусей, а хтосьці пазбаўлены такой магчымасці. І як за гэта браць грошы?

У чым сэнс паліву гусей? Сутнасць простая:

1. Вы паліваеце гусака

2. Гусь увільгатняецца, ёй добра

3. Вам добра, таму што яму добра

4. Наогул усім добра

5.???

6. PROFIT!!!

Гусі любяць ваду, а сажалкі ў нас няма. Калі іх паліваць, яны ўзбадзёрваюцца. Можна напоўніць вядро з вадой, яны і там будуць купацца.

Чаму добра мацаць гусака? Звонку ён увесь такі водатрывалы і гладкі, а пад крыламі ў яго падпушак, ён там гарачы (у птушак заўсёды высокая тэмпература) і вельмі мяккі. Сама гусь, як правіла, супраць, але ёсць варыянты.

На фота злева — актуальныя гусі, справа — шланг.

Калі хто перажывае, нашых птушак мы не ямо. Яны былі заведзены для душэўнага спакою ў няпросты перыяд.

І так, мы пакой здаем.

А падпісацца на фэйсбук НН можна тут.

42
ром / Адказаць
19.04.2017 / 15:29
хрень какая то
0
Scooter / Адказаць
19.04.2017 / 15:32
Рэд. Дзякуй, выправілі.
2
Renessaince / Адказаць
19.04.2017 / 15:41
але там толькі дошкі і тлен.

Адкуль туды O2 паступае? Ці мелася на ўвазе тло?
Паказаць усе каментары/ 12 /
Каб пакінуць каментар, калі ласка, актывуйце JavaScript у наладах свайго браўзеру