Каля 5 раніцы 20 красавіка на вуліцы Магістральнай у Гродна адбылося ДТЗ.
Мужчына, кіруючы аўтамабілем «Мазда», не выканаў патрабаванні супрацоўнікаў ДАІ спыніцца і паспрабаваў уцячы.
«Парушальнік стаў з’язджаць па праспекце Касманаўтаў у бок вуліцы Кірава. На пуцеправодзе праспекта і вуліцы Будзёнага кіроўца дапусціў бакавы занос і заехаў на тратуар, дзе збіў жанчыну. У выніку наезду жанчына 1971 года нараджэння атрымала цяжкія траўмы і была шпіталізаваная ў рэанімацыйнае аддзяленне. Дактары змагаліся за яе жыццё, але жанчына памерла», — паведамляе прэс-служба ДАІ Гродна.
Па папярэдняй інфармацыі, кіроўцам аказаўся раней судзімы за хуліганства 30-гадовы мужчына, які ніколі не атрымліваў пасведчання кіроўцы. Медыцынскі агляд выявіў, што мужчына п’яны. Утрыманне алкаголю больш чым у 6 разоў перавышала дапушчальныя межы.
У цяперашні час на месцы ДТЗ праводзяцца неабходныя працэсуальныя дзеянні.
