Падчас звароту да парламента і народа Аляксандр Лукашэнка дазволіў сабе дзіўнае параўнанне ў дачыненні да міністра замежных справаў Уладзіміра Макея, калі гаварыў пра стасункі з Еўрасаюзам. «Макей ужо баіцца да вас ехаць… Высах увесь. Як вілачнік стаў, як у народзе кажуць», — адзначыў кіраўнік дзяржавы.
Фота sputnik.by.
Што такое вілачнік? У беларускай мове слова «вілачнік» мае некалькі значэнняў. Паводле аднаго, гэта кут у хаце, каля печы, дзе стаяць качарга, вілкі. Але па сэнсе мала падыходзіць да Макея.
А вось іншае — цалкам. Вілачнікам яшчэ называлі чаранок для вілаў, рагача. «Яна [маці] патрасла яму ад печы вілачнікам», — так пісаў Іван Пташнікаў. Ён сухі, тонкі, лёгкі, вось і кажуць: высах, як вілачнік.
А вось ва ўкраінскай мове слова «вілачнік» азначае самца аленя, казулі і іншых капытных звяроў, што маюць рогі ў форме вілаў.
