Праз скаргі абураных беларусаў «Белкніга» адмяніла сустрэчу з чарнасоценным расійскім пісьменнікам
Гісторыяй поспеху грамадзянскай супольнасці падзяліўся ў сваім фэйсбуку беларускі культуролаг Вадзім Мажэйка.
Напачатку мая ён звярнуў увагу на рэкламныя білборды ў Мінску, якія анансавалі сустрэчу з расійскім пісьменнікам Уладзімірам Еранасянам — гэты чалавек вядомы перадусім як радыкальны праціўнік незалежнасці Украіны.
Еранасян — армянін па нацыянальнасці. Некалькі гадоў таму гэты ўраджэнец расійскага Батайска ажаніўся з беларускай, таму пераехаў у Мінск. Яго даволі часта запрашаюць на ток-шоу на дзяржаўныя тэлеканалы. Еранасян пляжыць Еўрасаюз і хваліць Расію.
«Лейтматыў: амеры распалілі варажнечу паміж братэрскім народам… З украінцаў робяць вайсковы авангард для вайны з братэрскай краінай. … мілітарызаванай кучцы ўкраінскага народа, што стаў пад харугвы марыянетак… Тэрыторыя «незалежнай» — толькі плацдарм для разбурэння ганарлівых славян… Прысвячаецца ўсім дабраахвотнікам, якіх называюць «каларадамі», усім апалчэнцам, празваным «ватнікамі», «кацапам і маскалям», — прыводзіў Мажэйка цытаты з кніг Еранасяна, абураючыся тым, што для сустрэчы з чарнасоценскім гастралёрам дзяржаўная «Белкніга» прадастаўляе памяшканне.
На сваёй старонцы ў фэйсбуку Мажэйка прапанаваў пісаць лісты да дырэктара «Белкнігі» з патрабаваннем скасаваць мерапрыемства.
Адказ прыйшоў даволі хутка — мерапрыемства адмянілі.
Паказальна, што ў каментарыях на старонцы Вадзіма Мажэйкі на бок пісьменніка стаў тутэйшы тэлеперсанаж Пётр Пятроўскі, які даводзіў, што забарона на выступ парушае свабоду слова, на што Мажэйка адказаў яму, што самае трапнае месца для такіх сходаў — «Дом Масквы», а не афіцыйная кнігарня дзяржавы, якая ў канфлікце суседзяў стаіць на нейтральных пазіцыях.
У каментары «Нашай Ніве» культуролаг заўважыў, што ў дадзенай сітуацыі галоўную ролю адыграў, найхутчэй, сам факт звароту.
«Я думаю, што ў «Белкнізе» спачатку проста не прагуглілі, каго яны запрашаюць, таму звароты ў нейкай ступені расплюшчылі ім вочы. Магу падумаць, што нашым уладам не патрэбныя сёння выступы адыёзных асоб. А колькі зваротаў было? Мо дзясятак, мо некалькі дзясяткаў», — сказаў Павал Мажэйка.
Нагадаем, што сустрэча з яшчэ адным імперскім пісьменнікам і прапагандыстам Мікалаем Старыкавым у Мінску пачалася з патасоўкі.
Цяпер чытаюць
Арыштаваны чыноўнік, які мог стаць наступным міністрам аховы здароўя8
Каментары