У Віцебску мужчына з помсты падпаліў аўтамабіль суседа, паведаміла БЕЛТА афіцыйны прадстаўнік упраўлення Следчага камітэта па Віцебскай вобласці Святлана Сахарава.
Фота УСК па Віцебскай вобласці
Віцебскім гарадскім аддзелам Следчага камітэта выстаўленае абвінавачванне ў наўмысным знішчэнні і пашкоджанні маёмасці жыхару Віцебска, які з помсты падпаліў аўтамабіль 44-гадовага знаёмага. З моманту затрымання мужчына ўтрымліваецца пад вартай.
Інцыдэнт адбыўся ў мікрараёне Білева ноччу 13 мая. У двары шматкватэрнага жылога дома па вуліцы Караткевіча адбыўся пажар. Гарэў аўтамабіль Volkswagen Golf, 1988 года выпуску. Каля 2 гадзін ночы жыхары паведамілі пра ўзгаранне ў МНС і міліцыю. Агонь паспеў пашкодзіць і аўтамабілі Mazda і Nissan Primera, якія стаялі побач.
На месца здарэння прыбыла следча-аператыўная група, якая правяла агляд месца здарэння, апытала відавочцаў і ўладальнікаў аўтамабіля. Па гарачых слядах супрацоўнікі органаў унутраных спраў знайшлі і затрымалі падазраванага ў падпале аўтамабіля. Ім аказаўся 52-гадовы жыхар Віцебска, які раней адседзеў за забойства 7,5 года.
Следчыя высветлілі, што мужчына мэтанакіравана рыхтаваўся да падпалу аўтамабіля новага суседа, які восенню мінулага года набыў суседні прыватны дом у Кастрычніцкім раёне Віцебска. Канфлікт паміж суседзямі прывёў да таго, што мужчына высачыў, дзе пацярпелы пражывае ў мікрараёне Білева і ставіць свой аўтамабіль. У пачатку мая падазраваны прыехаў туде на ровары і пракалоў усе колы Volkswagen. А ўжо ў ноч на 13 мая пасля ўжывання спіртных напояў вырашыў падпаліць аўтамабіль суседа: разбіў шкло, абліў салон бензінам і падпаліў. Аўтамабіль быў цалкам знішчаны.
Па гэтым факце Віцебскім ГОСК распачатая крымінальная справа па ч.2 арт. 218 Крымінальнага кодэкса Беларусі (наўмыснае знішчэнне і пашкоджанне маёмасці, учыненыя агульнанебяспечным спосабам).
Следчыя правялі ператрус па месцы жыхарства затрыманага, у выніку якога канфіскавалі ровар, спецвопратку, пальчаткі, гаруча-змазачныя і лёгка самазапальваючыя вадкасці. Для вызначэння нанесенай шкоды пацярпелым у выніку пажару прызначаныя экспертызы.
Расследаванне крымінальнай справы працягваецца.
