Чытач «Нашай Нівы» даслаў у рэдакцыю ліст з цікавым лайфхакам.
Вось як ён апісвае сваю гісторыю.
«Не хацеў хадзіць па крамах, ды трэба было купіць на лета сандалі, — піша чытач. — Як зрабіць? Звярнуўся да папулярнай у сталіцы анлайн-крамы. Гэта калі ты праз інтэрнэт абіраеш сабе рэч, а пасля прыязджаеш на месца выдачы, адкуль забіраеш. Зручна, што наперад можна бачыць мадэльны шэраг, і цэны ніжэйшыя, чым у канкурэнтаў з класічнай мадэллю продажаў. Пад сябе сандалі знайшоў хутка — і дызайн нічога, і на зніжцы 50%! А калі замаўляеш цягам 10 хвілін на сайце, то скідаюць і яшчэ 10%. Атрымліваецца, што канчатковая цана на мае сандалі склала трохі болей за 31 рубель. Але такі нюанс — для ўсіх замоваў менш за 35 рублёў (а без той зніжкі на 10% яны і былі акурат 35, дарэчы) прымерка на месцы выдачы платная — 8 рублёў. Бясплатна забраць можна, але не дадуць памераць. Атрымліваецца, было тры варыянты — або адмовіцца ад другой зніжкі на 10% і купіць за 35 рублёў, або ўзяць без прымеркі ўсляпую, або аддаць амаль 40 рублёў з улікам «зніжкі» і пераплаціць.
І што зрабіў наш чытач, каб яго не абулі на тыя 8 рублёў?
Ён зрабіў папярэднюю замову дзвюх аднолькавых пар — адну з прымеркай, другую без.
Прыехаўшы, ён памераў пару за 40 рублёў — усё аказалася добра — і сказаў, што яе браць не будзе. Але вось тую, маўляў, (якая без прымеркі) я вазьму.
Менеджары толькі развялі рукамі і прадалі сандалі за 31 рубель.
