19 чэрвеня на гарадскім дзіцячым пляжы ў Салігорску адпачывальнікі пачулі крыкі аб дапамозе — у вадаёме танула 11-гадовая дзяўчынка. Школьніцу выцягнула 28-гадовая мясцовая жыхарка. Пра гэта паведамляе прэс-служба МНС.
Інцыдэнт адбыўся каля 16.00 у панядзелак.
Школьніца не змагла ўтрымацца на вадзе і пачала тануць. З-за моцнага ветру дзяўчынка не магла рухацца ў бок берага. 28-гадовая мясцовая жыхарка, адпачывальніца на пляжы са сваім дзіцем, пачуўшы крыкі дзяўчынкі, адразу ж кінулася ёй на дапамогу.
«Падплыла — дзяўчынка пайшла на дно. Я толькі ўбачыла рукі выцягнутыя, вочы мутныя — нават зрэнак не было бачна», — распавяла Кацярына.
Жанчына падплыла да дзяўчынкі са спіны і, узяўшы яе пад рукі, выцягнула на бераг. Дзяўчынка была без прытомнасці, і Кацярына пачала рабіць штучнае дыханне.
Калі дзяўчынка прыйшла да памяці, яе першымі словамі былі: «Я ніколі не бачыла смерць так блізка». Як стала вядома пазней, школьніца прыйшла на вадаём з дзвюма сяброўкамі-аднагодкамі без суправаджэння дарослых.
У МНС яшчэ раз нагадалі бацькам, што нельга пакідаць дзяцей без нагляду.
