У Мінску прайшоў традыцыйны парад 3 Ліпеня. Як і ў мінулыя гады, ён уяўляў сабой гібрыд маскоўскіх парадаў і БССРаўскіх «шэсцяў працоўных» перад трыбунай з кіраўніцтвам.
Перад трыбунай з кіраўніцтвам краіны прамаршыравалі вайскоўцы — у тым ліку дэсантнікі з суседняй дзяржавы, праехала тэхніка. Над горадам праляцелі самалёты і верталёты.
Пасля на машынах правезлі ўзоры прадукцыі — у тым ліку батоны кілбасы «Белдзяржхарчпрама» і пральныя машыны «Атланта».
Трактары МТЗ выканалі балет, а салісты і хор — гімн «Жыве Беларусь» на словы Уладзіміра Някляева, у варыянце дзе слова «Жыве» заменена на «Слаўся».
Маладыя фізкультурнікі зладзілі кароткае гімнастычнае шоу.
Усё гэта было вытрымана ў патэтычным стылі, з прэтэнзіяй на масавасць і ўрачыстасць, хоць і без паўночнакарэйскага фанатызму.
Аляксандр Лукашэнка выступаў па-руску. Руская застаецца і мовай вайсковага рытуалу: па-руску вітаў парадныя разлікі міністр абароны.
Вядучы дзяржаўнага тэлебачання таксама каментаваў парад па-руску. «Это было потрясающе, просто неимоверно, неописуемо!» — захлыналіся ў эпітэтах яны, хоць гледачы не пабачылі нічога такога, чаго б не бачылі ў мінулыя гады.
Аляксандр Лукашэнка прысутнічаў у мундзіры галоўнакамандуючага, праваруч яго стаяў генералітэт — Раўкоў, Зась, Вакульчык, Шуневіч, Канюк, Наскевіч ды іншыя, леваруч — цывільнае кіраўніцтва краіны: Кабякоў, Мясніковіч, Андрэйчанка, Качанава, Міклашэвіч, Анфімаў, Сукала, Калаўр, Шорац.
З узгоркаў вакол праспекта Пераможцаў за парадам і шоу назіралі некалькі дзясяткаў тысяч гледачоў.
«Разам з брацкай Расіяй мы абараняем межы Саюзнай дзяржавы, якую мы ствараем, — адзначыў у сваёй прамове Аляксандр Лукашэнка. — На шлях мілітарызацыі ўступілі краіны Еўропы. Яны ўцягваюцца ў гонку ўзбраенняў і ваенныя прыгатаванні. Злучаныя Штаты Амерыкі разгортваюць тут, ля нашых межаў, сістэму супрацьракетнай абароны і ўдасканальваюць свой ядзерны патэнцыял. Наш адказ — сучасная беларуская армія. Яна ўвесь час мадэрнізуецца, мабільная, навучаная і ўзброена», — сказаў Лукашэнка.
Нагадаем, што 3 ліпеня 1944 года савецкая армія вызваліла Мінск ад нацыстаў. Незалежнасць Беларусі была ўпершыню абвешчана 25 сакавіка 1918 года. 27 ліпеня 1990 года ў працэсе распаду СССР была прынятая Дэкларацыя аб дзяржаўным суверэнітэце. А 25 жніўня 1991 года ёй быў нададзены статус канстытуцыйнага акта.
25 Сакавіка традыцыйна адзначаецца як Дзень Волі, 3 Ліпеня стаў дзяржаўным святам з 1996 года пад назвай Дзень Рэспублікі (Дзень Незалежнасці).
