П'яная рэўнасць стала прычынай дэбошу у вёсцы Неманіца Барысаўскага раёна. Пад падазрэннем у хуліганстве — 28-гадовы мясцовы жыхар і яго 42-гадовая каханка, распавялі ва УУС Мінаблвыканкама.
Напярэдадні пара гасцявала ў аднавяскоўцаў. Сустрэча зацягнулася да позняга вечара.
«Па дарозе дадому закаханыя пасварыліся і вярталіся ўжо не разам. У нейкі момант п'янай жанчыне здалося, што яе каханы зайшоў у дом, у якім нібыта пражывала яго палюбоўніца. Яна раззлавалася і пачала біць шкло ў доме тратуарнай пліткай», — распавёў начальнік крымінальнага вышуку Загароднага аддзела міліцыі Барысаўскага РУУС Дзмітрый Калечанок.
Усяго зламысніца пашкодзіла 8 шклопакетаў і ўваходныя дзверы, прычыніўшы шкоду на 10 тыс. рублёў (прыкладна $5000) гаспадару асабняка, які на момант злачынства знаходзіўся ў Барысаве.
Аказалася, кавалер сапраўды звярнуў на дарогу да чужой дачы, але крыху далей ад месца здарэння. Разбіўшы шкло, ён пракраўся ў жыллё і заснуў. Раніцай няпрошанага госця заспеў гаспадар, які і выклікаў міліцыю.
Падазраваных затрымалі. У дачыненні да жанчыны распачата крымінальная справа па ч.1 арт.339 КК Беларусі (хуліганства). Ёй пагражае да 3 гадоў пазбаўлення волі з кампенсацыяй шкоды.
Дзеянням кавалера даецца прававая ацэнка. На месцы здарэння ён нічога ня скраў.
Цяпер чытаюць
Радыёвядучы расказаў пра ўнутраную кухню АНТ — і пра тое, як ператварыўся ў палітвязня2
Каментары