Ірландская авіякампанія-лаўкостар Ryanair адмяніла запланаваны выхад на ўкраінскі рынак. Пра гэта гаворыцца ў паведамленні прэс-службы авіяперавозчыка, піша УП.
«Ryanair аб'яўляе, што адмяняе свой запланаваны прыход ва Украіну пасля таго, як кіеўскі аэрапорт не выканаў пагадненне, дасягнутае ў Міністэрстве інфраструктуры са службовымі асобамі аэрапорта і цяперашнім генеральным дырэктарам аэрапорта спадаром Рабікіным у сакавіку гэтага года», — гаворыцца ў паведамленні.
У Ryanair адзначылі, што аэрапорт «Барыспаль» устаў на бок авіякампаній з высокімі тарыфамі, уключаючы «Міжнародныя авіялініі Украіны», і пазбавіў украінскіх пасажыраў доступу да танных авіябілетаў.
«У выніку ў Ryanair няма выбару, акрамя як адмяніць 4 новыя кіеўскія маршруты і 7 новых львоўскіх маршрутаў, што прывядзе да страты больш за 500 000 пасажыраў і 400 працоўных месцаў», — дадалі ў кампаніі.
Ryanair прыносіць прабачэнні кліентам, якія ўжо забраніравалі рэйсы. Ім вернуць сродкі за квіткі.
