Велізарныя чорныя лебедзі вымерлі пасля таго, як з Палінэзіі ў XIII стагоддзі сюды прыбылі людзі. Навукоўцы доўга спрачаліся, ці існавала на самай справе Пууве — гіганцкая падобная на лебедзя птушка. Пра яе вядома з легенд карэннага насельніцтва архіпелага Чатэм, размешчанага за 650 км на ўсход ад выспаў Новай Зеландыі.
Даследчыкі з універсітэта Атага параўналі ДНК 47 аўстралійскіх чорных лебедзяў, якія жывуць сёння, з ДНК 39 закамянелых птушак, якія былі знойдзеныя на тэрыторыі Новай Зеландыі і бліжэйшых астравоў.
Аналіз ДНК паказаў, што генетычна чорны аўстралійскі лебедзь аддзяліўся ад гіганцкага суродзіча каля аднаго-двух мільёнаў гадоў таму. Навукоўцы выказалі здагадку, што ў гэты час аўстралійскія чорныя лебедзі мігравалі ў Новую Зеландыю, і ўжо тут ператварыліся ў асобны від, які навукоўцы назвалі Poūwa.
Навазеландская птушка была на 20-30% цяжэйшай за сучасных аўстралійскіх асобін — яе маса магла дасягаць дзесяці кілаграм (маса сучасных чорных лебедзяў не перавышае дзевяці кілаграм). Акрамя таго, у дагістарычнага лебедзя былі больш доўгія ногі, а крылы трохі карацейшыя. Гэта кажа пра тое, што яны ляталі толькі ў выпадку вострай неабходнасці. На востраве не было драпежнікаў-сысуноў, таму іх адзінымі ворагамі маглі быць арлы, як і ў выпадку з гіганцкімі вымерлымі птушкамі моа.
Чытайце таксама: Гісторыя птушак моа вышынёй 3,5 метра, якія былі знішчаныя 500 гадоў таму, але, магчыма, яшчэ існуюць
