Пра гэта паведаміў прэсавы сакратар Прафсаюзу радыёэлектроннай прамысловасьці Мікалай Герасіменка.
Ігар Комлік — галоўны бухгальтар і старшыня Менскай гарадзкой арганізацыі прафсаюзу РЭП. Яго затрымалі 2 жніўня паводле крымінальнай справы за нясплату падаткаў і зьмясьцілі ў Цэнтар ізаляцыі правапарушальнікаў. Паводле закону, праз 72 гадзіны затрыманага належыць або адпусьціць, або вызначыць яму далейшую меру стрыманьня. У дачыненьні да Ігара Комліка такой мерай стала зьмяшчэньне пад варту у Сьледчы ізалятар № 1 на вуліцы Валадарскага ў Менску.
Праваабарончыя арганізацыі яшчэ 3 жніўня заявілі, што лічаць Ігара Комліка палітвязьнем.
Паводле праваабаронцаў, распачатая супраць прафсаюзных лідэраў крымінальная справа палітычна матываваная, зьвязаная з актыўнай прафсаюзнай дзейнасьцю і мірным ажыцьцяўленьнем права на свабоду асацыяцыяў.
