Ярмошына: Росквіт дэмакратыі 4

Кандыдатамі ў дэпутаты Палаты прадстаўнікоў Нацыянальнага сходу 4‑га скліканьня зарэгістраваныя 276 чалавек (усяго вылучалася 365 чалавек). Конкурс на дэпутацкае месца складзе 2,5 чалавекі на месца.

Пра гэта на прэс‑канфэрэнцыі 29 жніўня паведаміла старшыня Цэнтарвыбаркаму Лідзія Ярмошына.

Нагадаем, што ў 2000 г., калі апазыцыя байкатавала выбары, на дэпутацкі мандат прэтэндавала ў сярэднім 5,3 чалавекі, у 2004 — 3,26. Сёлета будзе пабіты антырэкорд.

Па выніках працы акруговых камісій 27‑28 жніўня 84 прэтэндэнтам было адмоўлена ў рэгістрацыі, што складае 23 % ад агульнай колькасьці. Галоўнай прычынай адмоваў зьяўляюцца няправільна сабраныя подпісы (напрыклад, ад жыхароў розных выбарчых акругаў). Другая прычына — няправільна запоўненыя дэклярацыя. Хаця тут, як прызналася Ярмошына, акруговыя камісіі дзейнічалі «занадта строга». Яна прывяла прыклада аднаго з кандыдатаў, якому ў правіну паставілі паставілі незадэкляраваны матацыкл, які даўно згарэў (хутчэй за ўсё маецца на ўвазе камуніст Аляксандар Апанасюк з Століна).

Пяць чалавек добраахвотна зьняліся з дыстанцыі, у тым ліку дэпутаты палаты сёньняшняга скліканьня — Сяргей Касьцян, Анатоль Красуцкі, Мікалай Чурсін.

Рэгістрацыю ў якасьці кандыдата жаўнера тэрміновай службы з Кажан‑Гарадка Віталя Каратыша Ярмошына назвала «росквітам дэмакратыі». Хлопцу на час выбарчай кампаніі далі месячны адпачынак у вайсковай часьці.

119 чалавек былі вылучаныя шляхам збору подпісаў, 96 — двайным (збор подпісаў і працоўныя калектывы), і 20 — грамадзянамі і палітычнымі партыямі, 4 — трайным (грамадзянамі, партыямі, працоўнымі калектывамі), 11 — працоўнымі калектывамі, 26 — палітычнымі партыямі.

Скаргі на адмову будуць разглядацца зь серады, кажа Л. Ярмошына. Ужо пададзена дзевяць скаргаў.

Старшыня ЦВК выказала шкадаваньне, што ў якасьці кандыдату па Ваўкавыску ня быў зарэгістраваны граф Прушынскі. «Шкада, маглі б атрымацца цікавыя выбары па гэтым участку».

Ярмошына таксама сказала, што ня ведае, чаму Вінцуку Вячорку і Віктару Івашкевічу адмоўлена ў рэгістрацыі. «Са мной па гэтым пытаньні не кансультаваліся», — кажа старшыня ЦВК.

Спадарыня Ярмошына зазначыла, што сёлета на выбарах прадстаўнікоў ад партый зьменшылася амаль у тры разы. У 2008 г. 118, супраць 316 у 2004 г.

Ідзе на выбары 38 былых дэпутатаў. Такім чынам як мінімум склад палаты прадстаўнікоў адновіцца на 65 %.

Лідзія Ярмошына зазначыла, што восем акругаў будуць безальтэрнатыўнымі:

Наваполацкая, Рагачоўская, Пінская‑вясковая, Ваўкавыская, Наваградзкая, Маладзечанская‑вясковая, Івацэвіцкая.

Найменшы «конкурс» сярод кандыдатаў у дэпутаты будзе на Гарадзеншчыне, нават меней чым два чалавекі на месца (13 акруг — 20 кандыдатаў). Найбольш конкурс на Магілёўшчыне і ў Менску, у некаторых акругах тут больш чым чатыры кандыдаты.

Рэгістрацыя па палітычных партыях выглядае наступным чынам: АГП — 26 чалавек, БНФ — 16, ПКБ — 13, КПБ — 13, БСДП — 11, ЛДП — 11, Партыя працы і справядлівасьці — 3, Аграрная — 3, БСДГ — 1. Сярод зарэгістраваных — 76 чалавек ад АДС, што складае 27,5 %.

З просьбай аб акрэдытацыі на парлямэнцкія выбары на дадзены момант зьвярнуўся 141 міжнародны назіральнік. Найбольшая прадстаўніцтва традыцыйна будуць мець місіі АБСЭ і СНД.

На пытаньне, ці згодная ЦВК прыняць падарунак ад заходніх краін у выглядзе ў празрыстых скрыняў, Ярмошына адказала: «Параўноўваць залежнасьць выбараў ад празрыстасьці скрыняў — гэта тое самае, што сьцьвярджаць, быццам жанчына, на якой менш вопраткі, мае больш адкрытую душу і чыстыя думкі, чым тая, якая ходзіць у наглуха зашпіленым швэдры. Галоўнае, што знаходзіцца ў гэтай скрыні. Нельга вызначыць зьнешне, што там — папера ці выбарчыя бюлетэні».

Зьміцер Панкавец

Фота Юліі Дарашкевіч