18 верасня ў Мінску быў затрыманы аргенцінскі мастак Францыска Басалеці.
«Так, Францыска затрымала міліцыя, непасрэдна зараз ён знаходзіцца ў РУУСе Кастрычніцкага раёна. Яго затрымалі падчас малявання мурала, бо не было афіцыйнай паперы, дазволу на маляванне, — патлумачыў Алег Ларычаў, вядомы графіці-мастак і куратар праектаў, звязаных з вулічным мастацтвам. — Насамрэч, мы вырашылі пачаць маляваць мурал загадзя, не дачакаўшыся афіцыйнага дазволу ад уладаў, бо магло не хапіць часу».
Сярод графіці-суполкі ўжо ходзяць чуткі, што міліцыю выклікала непасрэдна адміністрацыя раёна, праз рэпутацыю Ларычава.
Плюс, некаторыя графіці-мастакі сцвярджаюць, што Андрэй Шорац, старшыня Мінскага гарвыканкама, бачыў эскіз мурала Басалеці, і гэты эскіз чыноўніку не спадабаўся.
Па словах Алега Ларычава, цяпер вызваленнем мастака займаецца італьянская амбасада (Францыска мае італьянскі пашпарт).
«Абвінавацяць хутчэй за ўсё ў псаванні маёмасці. Але гэта яшчэ не дакладна. Пакуль я ведаю, што Францыска вінавацяць у тым, што вышка была прыпаркаваная на зялёнай зоне», — паведаміў Ларычаў.
Францыска Басалеці — аргенцінскі мастак. Займаецца стрыт-артам, асноўную вядомасць яму прынеслі «негатыўныя фрэскі» — муралы ў колеравай інверсіі. Адзін з такіх муралаў Басалеці планаваў намаляваць у Мінску.
Як пазней паведаміў Алег Ларычаў, пасля праверкі дакументаў у Кастрычніцкім РУУС, Басалеці адпусцілі.
Мурал, які малюе ў Мінску аргенцінец
