У тэрміновай харчовай дапамозе маюць вострую патрэбу 37 краін свету, якія пацярпелі ад канфліктаў і стыхійных бедстваў. Такія даныя прыводзяцца ў новым дакладзе Харчовай і сельскагаспадарчай арганізацыі Аб'яднаных Нацый, паведамляе Цэнтр навін ААН.
Аўтары дакладу адзначаюць, што ураганы ў Карыбскім басейне і паводкі ў Заходняй Афрыцы абярнуліся рэзкім скарачэннем вытворчасці прадуктаў харчавання ў 2017 годзе і, адпаведна, ростам колькасці людзей, якія маюць патрэбу ў знешняй дапамозе.
З 37 краін, якія адчуваюць дэфіцыт харчавання, 28 размешчаныя ў Афрыцы. Самая цяжкая сітуацыя на Афрыканскім кантыненце склалася ў Самалі, Нігерыі, Лівіі, Кеніі, Джыбуці, Бурундзі, Цэнтральнаафрыканскай Рэспубліцы, Чадзе і Паўднёвым Судане. У дапамозе звонку маюць патрэбу таксама жыхары Ірака, Гаіці, Пакістана, Йемена і Сірыі.
