Кіраўнік Раскамнагляду Аляксандр Жараў заявіў, што Facebook у 2018 годзе павінен пачаць захоўваць персанальныя даныя расійскіх карыстальнікаў на тэрыторыі Расіі, як таго патрабуе закон, паведамляе ВВС. У адваротным выпадку рэсурс будзе заблакаваны, прыгразіў ён.
«Закон абавязковы для ўсіх. У любым выпадку мы ці даможамся таго, каб закон быў выкананы, або кампанія спыніць працаваць на тэрыторыі Расійскай Федэрацыі, як, на жаль, адбылося з LinkedIn. Тут выключэнняў няма», — сказаў Жараў.
Па словах кіраўніка Раскамнагляду, у ведамстве ўсведамляюць, што «Facebook мае значную колькасць карыстальнікаў на тэрыторыі Расійскай Федэрацыі». «З іншага боку, мы разумеем, што гэта не ўнікальны сэрвіс, ёсць і іншыя сацыяльныя сеткі», — працягнуў ён.
Жараў нагадаў, што прадстаўнікі іншай сацыяльнай сеткі, Twitter, ужо пазначылі тэрмін лакалізацыі персанальных даных — сярэдзіна 2018 года. «Да гэтага моманту мы яе правяраць не будзем. А пасля гэтага моманту — адразу і праверым», — паабяцаў кіраўнік Раскамнагляду.