Аляксандр Лукашэнка сустрэнецца з удзельнікамі пленарнага пасяджэння Рады біскупскіх канферэнцый Еўропы. Сустрэча пройдзе ў Палацы Незалежнасці, паведамляе БелТА.
Рада біскупскіх канферэнцый Еўропы, створаная ў 1971 годзе, аб'ядноўвае старшыняў еўрапейскіх Канферэнцый каталіцкіх біскупаў. Мэта Рады — сумесная праца каталіцкіх біскупаў па пытаннях веры, праблемах секулярызацыі і глабалізацыі, развіцця місіянерскага і сацыяльнага служэння і іншых. Рада таксама прадстаўляе інтарэсы Каталіцкай царквы ў Еўрапарламенце і розных Еўракамісіях.
На пленарным пасяджэнні рады ў Мінску, якое пройдзе 28 верасня — 1 кастрычніка, будзе абмяркоўвацца праблема пастырства моладзі, а таксама роля царквы ў пераадоленні крызісаў сучаснай Еўропы.
Упершыню на беларускую зямлю адначасова прыбылі амаль пяцьдзесят вышэйшых каталіцкіх іерархаў Еўропы.
Апроч рыма-каталікоў, на сустрэчы прысутнічаюць і грэка-каталікі.