Намеснік міністра эканомікі расказаў, у які бізнэс ісці, калі ты звольніўся з завода
У кулуарах Беларускага інвестыцыйнага форума мы спыталіся ў намесніка міністра эканомікі Паўла Уцюпіна, як тыя людзі, якія працуюць за капейкі на датацыйных дзяржаўных заводах, могуць змяніць сваё жыццё і зарабляць больш.
Мы таксама прыгадалі гісторыю, якую «Нашай Ніве» расказвала Наталля Нікандрава, — калі буйная міжнародная шведская кампанія не здолела знайсці ў Беларусі патрэбную колькасць кваліфікаваных кадраў для адкрыцця філіяла вытворчасці.
Найперш чыноўнік сказаў, што дзяржава не плануе закрываць заводы.
«Я б не аперыраваў такімі тэрмінамі як «баласт», «скідваць», у нас сацыяльна-арыентаваная дзяржава, масавых звальненняў не будзе», — сказаў ён.
«А пытанне вашае філасофскае, — працягнуў ён. — Тут трэба думаць пра самаўдасканаленне. Вось, скажам, я ў міністэрстве адказваю за супрацоўніцтва з Кітаем, у тым ліку. І я адчуваю, як англійскай мовы мне ўжо бракуе, шукаю магчымасць вучыць кітайскую. Я да таго, што кожны сам павінен адчуваць сітуацыю і развівацца ў нейкі бок, але галоўнае — развівацца. Каб не зарабляць капейкі… Я веру, што ў нас шмат ініцыятыўных людзей, якія змогуць зарабляць у бізнэсе. Уласна, на гэта і накіраваныя тыя праекты зменаў, якія будуць прынятыя ў хуткім часе.
Куды ісці? Гэта рамесніцтва, аграсядзібы, сфера паслуг…
Я не кажу, што толькі прыватны бізнэс нас выратуе. З досведу ведаю, што калі ў чалавека няма «жылкі», ён не зможа гэтым займацца. Таму трэба цікавасць да атрымання новых ведаў і кампетэнцый самастойна, дзяржава тут дапаможа курсамі перападрыхтоўкі або фінансамі для адкрыцця справы — неўзабаве іх (грошай) трэба будзе нашмат меней, каб увайсці ў бізнэс».
Чыноўнік таксама канстатаваў, што хаця перад мясцовымі ўладамі і стаіць задача працаўладкавання беспрацоўных людзей, ідзе гэта не так паспяхова: маўляў, трэба прызнаць, што беларусы з'язджаюць на заробкі ў іншыя краіны.
«З аднаго боку, не забароніш ім выязджаць, але кепска, што яны знаходзяць магчымасці працаваць у Польшчы і Расіі. Трэба, каб яны стваралі дадатковую вартасць у нашай краіне. Таму перад намі і стаяць задачы, на ўсіх узроўнях, стварыць магчымасці для працы і вярнуць такіх рабочых на Радзіму», — сказаў Уцюпін.
На пытанне, дык калі ж беларусы перастануць ездзіць у Польшчу і Расію, чыноўнік развёў рукамі.
Каментары