Аляксандр Лукашэнка не супраць «вальнадумства» сярод студэнцтва, але абавязкова разам з патрыятычным выхаваннем. Пра гэта ён заявіў сёння, прымаючы рашэнні аб прызначэнні шэрагу кіраўнікоў ВНУ.
«Студэнты — вальнадумцы. Мы самі такімі былі. Не ведаю, як вы, а я дакладна. Таму не трэба ў іх гэтую жылку і струнку душыць», — падкрэсліў беларускі кіраўнік.
«Але іх трэба выхоўваць патрыётамі нашай краіны, каб не атрымалася так, што мы трацім тут грошы на іх выхаванне, а заўтра яны завярнуліся, працуюць невядома дзе і толку ад гэтага краіне няма», — дадаў Аляксандр Лукашэнка.
Кіраўнік дзяржавы таксама падкрэсліў асаблівую ролю рэктараў ВНУ і значнасць гэтай пасады. «Як толькі вы выйдзеце за парог гэтага кабінета, вы - людзі прэзідэнта. Вы ажыццяўляеце яго палітыку. У адваротным выпадку не трэба згаджацца і ісці на гэтыя пасады. Маю палітыку вы ведаеце: калі я недзе буду казаць не так і буду не мець рацыі, вы мне скажыце адразу. Рашэнне прынята, прамаўчалі — выконвайце. Гэта датычыцца ўсіх, - сказаў Аляксандр Лукашэнка. — Што тычыцца рэктараў, гэта асаблівыя людзі. Гэта людзі, якія куюць будучыню, эліту нашай краіны».
Ён падкрэсліў, што без высакакласных спецыялістаў, якіх рыхтуюць у ВНУ, не можа развівацца ніводная дзяржава. «Таму я надаю асаблівую ўвагу працы з рэктарскім складам. Мне перш за ўсё патрэбны парадак.
У ВНУ павінен быць парадак», — сказаў ён.
Кіраўнік дзяржавы таксама адзначыў, што выкладчыкі ВНУ, дзе ён вучыўся, аказалі на яго значны ўплыў. «Гэта завоблачныя былі людзі. І дастаткова свабодалюбныя людзі, з якімі я сябраваў, ужо быўшы прэзідэнтам, наведваючы універсітэт. Мы з імі асабіста сустракаліся, яны на мяне паўплывалі значна. Яны мелі свой пункт гледжання, пісьменна яго выказвалі», — распавёў беларускі лідар.
«Я заўсёды рэктарам зайздрошчу. Лічу, што гэта самая выдатная пасада для чалавека. Ты і выкладчык, і ў той жа час кіраўнік гэтых выкладчыкаў. Як трапіў у ВНУ, з тых часоў лічу, што рэктар - гэта вяршыня ўсяго. У мяне такое меркаванне склалася. Таму шануйце гэтую пасаду і адпавядайце ёй па самых высокіх стандартах», - казаў Аляксандр Лукашэнка.
Ён таксама папярэдзіў новых рэктараў аб недапушчальнасці якіх-небудзь карупцыйных праяў у іх працы. «Ніякіх сяброў у плане таго, што «я табе зраблю, ты - мне» і гэтак далей, і таму падобнае. Гэта бяда, трагедыя будзе ў вашым жыцці. Гэта адзінае, ад чаго я не змагу вас абараніць. Нікога не змагу абараніць. нават сваіх сыноў. Таму будзьце вельмі акуратныя і асцярожныя, будзьце справядлівыя», - падкрэсліў ён.
