Следчы камітэт працягвае расследаванне крымінальнай справы аб ДТЗ на вул. Кальварыйскай, распачатай у дачыненні да 29-гадовага грамадзяніна РФ, паведамляецца на сайце СК.
Нагадаем, 7 кастрычніка каля гадзіны ночы п'яны дырэктар фітнэс-цэнтра «Нардзін» Вячаслаў Карнеявец за рулём BMW пратараніў таксі Opel Astra. Кіроўца таксі атрымаў цяжкія траўмы, быў шпіталізаваны і да гэтага часу знаходзіцца ў цяжкім стане.
У ходзе высвятлення абставін здарэння следствам у дачыненні да Карнеяўца была дадаткова распачатая крымінальная справа па ч. 3 арт. 159 (пакіданне ў небяспецы) КК РБ. На падставе сабраных матэрыялаў яму завочна выстаўленае абвінавачванне па ч. 3 арт. 159 ч. 4 арт. 317 КК РБ, ён абвешчаны ў вышук.
У распараджэнні следства маецца інфармацыя пра месцазнаходжанне мужчыны ў Маскве. У гэтай сувязі СК будзе ўзаемадзейнічаць з кампетэнтнымі органамі юстыцыі РФ.
