Віцэ-прэм'ер-міністр і міністр культуры і нацыянальнай спадчыны Польшчы Пётр Гліньскі заяўляе, што з Украінай было знойдзенае паразуменне ў дачыненні да закона аб адукацыі ва Украіне ў частцы моў нацыянальных меншасцяў. Як перадае УНІАН, аб гэтым ён сказаў на брыфінгу ў Кіеве.
«Сёння, як толькі што я даведаўся, было падпісанае паразуменне — заява кіраўнікоў адукацыйных ведамстваў пасля вельмі плённага візіту спадарыні міністра Залеўскай ва Украіну, які прайшоў на мінулым тыдні, і дасягнутага з украінскім бокам узаемаразумення», — сказаў Гліньскі.
17 кастрычніка міністр адукацыі і навукі Украіны Лілія Грыневіч і міністр нацыянальнай адукацыі ПольшчЫ Ганна Залеўская заявілі, што будзе падпісаная дэкларацыя аб гарантыях прадстаўнікам польскай меншасці атрымання поўнай агульнай сярэдняй адукацыі ў польскіх школах ва Украіне на роднай мове з паслядоўным павелічэннем долі прадметаў, якія выкладаюцца на ўкраінскай мове.
Нагадаем, 25 верасня прэзідэнт Украіны Пятро Парашэнка падпісаў закон «Аб адукацыі», моўныя палажэнні якога (арт. 7 аб мове адукацыі ў Украіне) выклікалі неспакой Польшчы, Румыніі, Венгрыі, Грэцыі, Балгарыі. Новым законам ва Украіне ўводзіцца 12-гадовая сярэдняя адукацыя, мовай адукацыйнага працэсу ў навучальных установах з'яўляецца дзяржаўная мова — украінская. Парашэнка даручыў Міністэрству замежных спраў і Міністэрству адукацыі і навукі правесці па нагоды гэтага закона неабходныя кансультацыі з еўрапейскімі партнёрамі, у прыватнасці з Радай Еўропы.
