5 лістапада турыстычная агенцыя «Куфэрак падарожжаў» запрашае ў захапляльную вандроўку па гістарычнай Дзісеншчыне. Мы паглядзім помнікі гісторыі і культуры, успомнім славутых людзей, што мелі да іх дачыненне, пабачым сучаснае жыццё на той старажытнай зямлі.
Гістарычная Дзісеншчына — гэта не лапік тэрыторыі вакол аднайменнага гарадка ў Мёрскім раёне. Быў час, калі з Дзісны кіравалі цэлым краем. У Лівонскую вайну XVI стагоддзя, калі войска Івана Жахлівага захапіла Полацк, цэнтрам ваяводства лічылася Дзісна — аж пакуль кароль Стэфан Баторый не выгнаў захопнікаў.
Талер з выявай караля Стэфана.
Але маршрут вандроўкі ляжыць паўднёвей.
Докшыцы. Генрык Дмахоўскі
У Докшыцах, гісторыя якіх сягае аж у часы Грунвальдскай бітвы, мы пабачым не толькі храмы і помнікі, але і фрагменты гарадской забудовы XVIII ст., зможам уявіць, як выглядалі беларускія гарады ў мінулым.
Докшыцы. Фота Кастуся Шыталя.
Тут, пад Докшыцамі, каля маёнтка Парэчча загінуў і быў пахаваны між старажытных курганоў пад вёскай Бірулі скульптар, мастак і змагар за свабоду Генрык Дмахоўскі.
Ён удзельнічаў у паўстанні 1831 года на беларускіх землях, удзельнічаў у вулічных баях у Львове ў 1846-м, жыў у Францыі і Амерыцы,стварыў партрэты славутых змагароў за свабоду — Гарыбальдзі, Лаяша Кошута. Яго скульптуры Джэферсана, Вашынгтона і Франкліна ўпрыгожваюць Кангрэс ЗША. Але ў 1863-м, калі зноў пачалося паўстанне на радзіме, Дмахоўскі вярнуўся, каб узяць у ім удзел…
Мосар. Пілсудскія
У Мосары мы пабачым касцёл Святой Ганны і Кальварыю, упрыгожаныя дбаннямі ксяндза Юозаса Булькі. Шкада, што не захаваўся палац Бжастоўскіх, які быў гэткі ж шыкоўны, як і каралеўскі палац у варшаўскіх Лазенках. І гэта не адзінае, што яднае Мосар з кіраўнікамі Польшчы: ад 1870-х мястэчкам валодалі Пілсудскія — не продкі, але сваякі Начальніка польскай дзяржавы Юзафа Пілсудскага.
Удзела. Вацлаў Ластоўскі
А побач Удзела. Непадалёк ад яе, у засценку Калеснікаў, нарадзіўся Вацлаў Ластоўскі — аўтар першай «Гісторыі Беларусі», гісторыі беларускай кнігі і адзін з аўтараў беларускай незалежнасці.
Безумоўна ён не раз шпацыраваў у наваколлях Удзельскага францішканскага касцёла, побач з кляштарам. Ці не там нараджаліся яго ідэі?
Глыбокае. Драздовіч, Душэўскі, Напалеон
Ну і дыямент нашай вандроўкі — Глыбокае. Дыямент не толькі архітэктурны. Хоць, згодна з паданнем, тамтэйшы касцёл кармелітаў Напалеон хацеў забраць у Парыж і паставіць побач з Нотр-Дамам.
Фота radzima.org.
Тут мы паклонімся памяці Клаўдыюша Дуж-Душэўскага, стваральніка бел-чырвона-белага сцяга.
Помніць Глыбоччына і мастака Язэпа Драздовіча — аднаго з самых яскравых творцаў часоў нацыянальнага Адраджэння.
Тут ён нарадзіўся, тут пры канцы жыцця вандраваў, зарабляючы на хлеб аздабленнем сялянскіх хат…
Вас чакае захапляльны аповед дасведчанага экскурсавода пра гэтыя і іншыя падзеі.
Цана вандроўкі — 30 рублёў.
Запісацца можна тут.
Кантакты:
+375 29 1694811
+375 29 1117332
ТАА «Куфэрак падарожжаў». УНП 192012905
