Літаратура3939

Прэмію Гедройця здабыў Бартосік, Горвата няма нават у тройцы

У Мінску ўручылі беларускую літаратурную ўзнагароду з найбольшым грашовым фондам. Гедройця-2017 атрымаў Зміцер Бартосік за кнігу «Быў у пана верабейка гаварушчы».

Ён атрымае 5000 еўра ад фундатараў прэміі — Фонду «Вяртанне» і Польскага інстытута ў Мінску. Пасля цырымоніі ён паведаміў, што палову прэміі падорыць свайму сябру і рэдактару кнігі, былому кіраўніку «Нашай Нівы» Сяргею Дубаўцу, а другую палову — аддасць жонцы, «якая лепш ёю распарадзіцца».

48-гадовы Зміцер Бартосік нарадзіўся ў Рыбінску (Расея). Бацькі Змітра былі тэатраламі: бацька — рэжысёр, маці — акцёрка.

У школу ён пайшоў у Усць-Каменагорску (Казахстан). У 1978 годзе сям’я пераехала ў Гомель.

Вучыўся ў Ніжагародскай тэатральнай вучэльні, быў выключаны «за бяздарнасць». Пасля працаваў шліфоўшчыкам на Гомельскім заводзе станочных вузлоў, грузчыкам у краме, служыў у арміі.

Пасля дэмабілізацыі натрапіў на газету «Наша Ніва» і… зачараваўся беларушчынай. Прыехаў у Вільню, у рэдакцыю газеты і з таго часу перайшоў на беларускую мову.

Ён стаў бардам, у 2002 годзе выдаў кнігу апавяданняў з уласнага жыцця «Чорны пісталет». «Быў у пана верабейка гаварушчы» — найбольшы поспех Бартосіка. Яна сатканая з рэпартажаў, якія ён рабіў для радыё «Свабода».

Зміцер жыве ў Мінску. Разам з жонкай яны гадуюць чацвярых дзяцей: дачок Яню ды Юсцю ды сыноў Даната і Геру.

НН вяла анлайн-трансляцыю з цырымоніі ўручэння.

20:25

Ого, Горват не атрымаў ніводную з трох прэмій.

20:25

Першае месца — Зміцер Бартосік «Быў у пана верабейка гаварушчы».

20:22

Імя лаўрэата першага месца назаве Уладзімір Арлоў. А ўручаць прэмію будзе, як мы ўжо і казалі прадстаўнік фонда «Вяртанне» Сяргей Макарэвіч. Па словах Хадановіча, без «Вяртання» яны б і не ведалі, як бы знайшлі сродкі на прэмію.

20:19

Дык хто будзе першым? Горват? Бартосік? Ці, можа, Валерый Гапееў?

20:19

Другое месца ў Людмілы Рублеўскай за раман «Дагератып». Рублеўская шмат разоў была ў шорт-лістах Гедройца, але вось у тройку трапляе ўпершыню.

20:18

Выступ тэатру танцу SKYLINE

20:16

За другое месца даюць творчую вандроўку на шведскую выспу Готланд у горад Вісбю.

Называюць імя Алена Брава і Альгерд Бахарэвіч. Апошні сам ужо неаднаразова атрымліваў менавіта другую прэмію Гедройца. Напрыклад, летась. Тады на ўручэнне прэміі Бахарэвіч не прыйшоў. Сёння, як сябра журы, ён у зале.

«У мяне вельмі складаныя дачыненні з прэміяй Гедройца», — кажа Бахарэвіч.

«Асабліва з другім месцам», — кажа Хадановіч.

«Я тройчы атрымліваў другое месца», — з горкай іроніяй кажа Альгерд.

«Але ж гэта лепш за трэцяе», — зноў рэмарка ад Хадановіча.

20:11

Адам Глобус атрымае права на выданне кнігі ў выдавецтве «Кнігазбор».

Іншы сябра журы Павел Касцюкевіч сказаў, што цэлы дзень угаворваў Глобуса прыйсці на цырымонію, але той адмовіўся.

20:09

Выходзіць падляшскі пісьменнік Міхась Андрасюк, сябра журы, які мае абвесціць імя лаўрэата трэцяй прэміі. Андрасюк гаворыць з шыкоўным падляскім акцэнтам. «Трэба было адсеяць добрае ад добрага, выдатнае ад выдатнага»

І трэцяе месца дастаецца Адаму Глобусу за кнігу «Зваротная перспектыва».

19:58

Дарэчы, людзей троху паболела. Цяпер ужо далёка не ўсім хапае сядзячых месцаў.

19:56

Зачытваюць урыўкі з твораў намінантаў. У гэты час выступае тэатр танцу SKYLINE. Дастаткова нязвыклае відовішча. Дзяўчаты то поўзаюць на падлозе, як вужакі, то ходзяць па сцэне, нібы зомбі.

19:48

Раіса Баравікова, як сябра журы, кажа, што абраць пераможцаў было «неверагодна цяжка». 

19:47

Вядучы Андрэй Хадановіч

19:38

Выступае Паліна Рэспубліка.

19:37

Матэуш Адамскі паўтарае тэзы Ежы Гедройца, што незалежнасць і дабрабыт Украіны, Літвы і Беларусі толькі на карысць Польшчы. Выступае па-беларуску, па паперцы.

19:30

У другі раз грашовае вымярэнне прэміі складае 5 тысяч еўра. Раней прэмія «каштавала» 10 тысяч. Ад польскага боку ў зале прысутнічае дырэктар Польскага інстытуту ў Мінску Матэуш Адамскі. А вось польскага пасла на гэты раз не было. Менавіта польскае пасольства некалі было заснавальнікам гэтай прэміі.

19:27

Зміцер Бартосік у зале, махае рукой, калі яго прадстаўляюць. «Звярніце ўвагу на гэтую магутную постаць», — кажа Хадановіч.

Потым вядучы называе Горвата «самым папулярным беларускім пісьменнікам на сённяшні дзень».

Валерый Гапееў сядзіць у першым шэрагу, а вось Рублеўская села на сярэднія шэрагі.

19:23

Андрэй Хадановіч узгадвае страшную дату — 29 кастрычніка 1937 года, калі ў адну ноч была расстраляная ўся эліта беларускай літаратуры. 

Зала ўстала з хвілінай маўчання ў памяць ахвяр 1937 года.

19:20

Адама Глобуса на мерапрыемстве таксама няма, як і Горвата. Сяргей Календа сядзіць у першым шэрагу, вельмі засяроджаны, у гальштуку і кедах. Яго вельмі міла трымае за руку жонка.

19:19

Чэк на 5 тысяч еўра будзе ўручаць прадстаўнік фонда «Вяртанне», былы супрацоўнік «Нашай Нівы» Сяргей Макарэвіч. Пераконвае, што не ведае імя пераможцы.

19:18

Адкрывае імпрэзу Паліна Рэспубліка. Выконвае кранальную кампазіцыю «Апошні лістапад, прайшла сяброўка восень».

Такое ўражанне, што на ўручэнне прэміі прыйшло каля сотні чалавек.

19:18

Андруся Горвата з казой не бачна.

19:18

З вядомых пісьменнікаў у зале Уладзімір Арлоў, Валерый Гапееў, Альгерд Бахарэвіч, Алена Брава, Раіса Баравікова, Павел Касцюкевіч, Барыс Пятровіч. 

Нельга сказаць, што вялікі глядацкі ажыятаж. 

19:18

«ОК16» — гэта такая новая культурная пляцоўка ў былым будынку завода МЗОР. Тры дні назад тут праходзіў фэст крафтавага піва, цяпер імпрэза да прэміі Гедройца.

Вядучым мерапрыемства будзе традыцыйна паэт Андрэй Хадановіч. 

18:26

Цырымонія распачнецца а 19-й гадзіне ў арт-прасторы «ОК16» на Кастрычніцкай — так званай менскай «Хіпстар-штрасэ».

У мінулыя гады часам прэмію атрымліваў відавочны фаварыт, як Уладзімір Някляеў з «Аўтаматам з газіроўкай…». А парою журы аддавала ўзнагароду зусім нечакана. Так было летась з Максімам Шчуром.

На Прэмію Гедройця сёлета прэтэндавалі сем літаратараў. Сярод іх былі Андрусь Горват са сваім «Радзівам Прудок», Зміцер Бартосік з «Быў у пана верабейка гаварушчы» і аўтарка папулярных прыгодніцкіх раманаў Людміла Рублеўская.

Прэмія імя Ежы Гедройца была заснавана ў 2011 годзе. Яе прысуджаюць за найлепшую кнігу прозы, выдадзеную (у папяровым або электронным варыянтах) у папярэднім годзе на беларускай мове ў жанрах «мастацкая проза» і «эсэістыка».

Заснавальнікамі літаратурнай ўзнагароды выступілі амбасада Польшчы, Беларускі ПЭН-цэнтр і Саюз беларускіх пісьменнікаў.

Прэмія была названая ў гонар ураджэнца Мінска, публіцыста і палітыка Ежы Гедройця, які ў сваёй культурнай дзейнасці быў паслядоўным прыхільнікам добрасуседскіх зносінаў паміж Польшчай і Беларуссю, Літвой і Украінай.

Адзначым, што кожны аўтар мае магчымасць атрымаць прэмію толькі адзіны раз у жыцці.

Лаўрэаты прэміі Гедройця мінулых гадоў

2012 Павал Касцюкевіч «Зборная Рэспублікі Беларусь па негалоўных відах спорту»

2013 Уладзімір Някляеў «Аўтамат з газіроўкай з сіропам і без»

2014 Ігар Бабкоў «Хвілінка»

2015 Віктар Казько «Час збіраць косці»

2016 Макс Шчур «Завяршыць гештальт»

Каментары39

 
Націсканне кнопкі «Дадаць каментар» азначае згоду з рэкамендацыямі па абмеркаванні.

Цяпер чытаюць

Эйсманты на «Майбаху», Баскаў на «Бэнтлі». Хакейны сезон у Мінску закрылі з шыкам-бляскам42

Эйсманты на «Майбаху», Баскаў на «Бэнтлі». Хакейны сезон у Мінску закрылі з шыкам-бляскам

Усе навіны →
Усе навіны

Калабаранта з Новай Кахоўкі, які мацюкаўся на камеру, затрымалі за «рэабілітацыю нацызму»3

«Вызваленне аднаго — гэта крок наперад». Ціханоўская пракаментавала вызваленне Зянковіча6

На мінскім «Крышталі» будуць выпускаць гарэлку «Сукалень»19

Юрась Зянковіч выехаў у Літву6

У гродзенскай сінагозе знеслі частку сцен — хочуць вярнуць гістарычны выгляд

Амерыканцы дабіліся вызвалення Юрыя Зянковіча. Ён быў прысуджаны да 13,5 года зняволення20

Трэба стаць новым Ізраілем. У Беларусі прыдумалі, як развіваць стартапы7

Цягнік Мінск — Гомель сутыкнуўся з лесавозам1

Вушная сера можа шмат расказаць пра ваша здароўе1

больш чытаных навін
больш лайканых навін

Эйсманты на «Майбаху», Баскаў на «Бэнтлі». Хакейны сезон у Мінску закрылі з шыкам-бляскам42

Эйсманты на «Майбаху», Баскаў на «Бэнтлі». Хакейны сезон у Мінску закрылі з шыкам-бляскам

Галоўнае
Усе навіны →

Заўвага:

 

 

 

 

Закрыць Паведаміць