У маіх прапрадзеда Фадзея Вальковіча і прапрабабкі Анэлі з Драздова, што мелі сваю сядзібу і гаспадарку (дом, зямля, стайня, кароўнік, сад) у Белым Балоце (гэта за восем кіламетраў ад в. Копішча Мінскага раёна) было сямёра дзяцей. Але ў іх жыццё напрыканцы 20-х гг. нахабна ўварвалася дзяржава, растаптаўшы іхнія лёсы. Спачатку гэта было раскулачванне, калі адабралі ўсю маёмасць, здабытую ўласнай працай, раскідаўшы некалі дружную сям'ю па ўсім свеце, а некаторых яе чальцоў пазбавіўшы жыцця і добрага імя, а іхніх дзяцей — бацькоў. З таго часу чырвоныя крывавыя клюшні НКВД ужо не выпускалі ад сябе нікога, хто не паспеў выкараскацца… Вось як склаўся лёс дзяцей Анэлі і Фадзея, маіх прадзедаў па кудзелі. Мікола Вальковіч, старэйшы сын і мой прадзед, бацька майго дзеда.
Вальковіч Мікалай Фадзеевіч
Месца нараджэння: х. Белае Балота Паперненскага сельсавет Мінскага р-на
Пол: мужчына
Нацыянальнасць: беларус
Адукацыя: н/пачатковая
Прафесія/месца працы: калгаснік, калгас «Бальшавік»
Месца пражывання: Мінская вобл., Мінскі р-н, у Калодзішчах сельсавет х. Рэп'е
Дата арышту: 20 лістапада 1937 г.
Абвінавачванне: 72 КК БССР — А/с агітацыя
Асуджаны: 29 лістапада 1937 г.
Судовы орган: «тройка»
Прысуд: 10 гадоў ППЛ, адбываў: Цемнікаўскі ППЛ Мард.АССР, памёр 1940/09/03, у ППЛ
Дата рэабілітацыі: 30 красавіка 1989 г.
Рэабіліт. орган: Пракуратура Мінск. вобл.
Архіўная справа: КДБ РБ — 25486-с
Крыніцы дадзеных: БД «Ахвяры палітычнага тэрору ў СССР»; Беларускі «Мэмарыял», то бок быў закатаваны ў сумнавядомым Цемнікаўскім ГУЛАГу.
Аляксандр Вальковіч, 1886 г.н., пасля жаніцьбы жыў у Моўчанах, рэпрэсаваны, дадзеных па ім не знайшла.
Хведар Вальковіч, удалося пазбегнуць рэпрэсавання, бо, як казала бабка, быў у калгасе ўмелым кавалём, памёр у 1966 годзе;
Лештына Вальковіч, 1888 г.н., яе выратавала тое, што яна яшчэ да тых крывавых падзей пабралася шлюбам і з'ехала з мужам у Беласток. Памерла ў канцы 50-х.
Вальковіч Іван ФадзеевічДата нараджэння: 1884 г.
Месца нараджэння: с. Белае Балота Астрашыцка-Гарадоцкага р-на Мінскай акругі
Пол: мужчына
Нацыянальнасць: беларус
Адукацыя: н/пачатковая
Прафесія/месца працы: селянін, аднаасобная гаспадарка
Месца пражывання: Мінская вобл., Астрашыцка-Гарадоцкі р-н, в. Белае Балота
Дата арышту: 19 мая 1928 г.
Абвінавачванне: 58/13 КК РСФСР — а/с дзейнасць
Асуджаны: 22 верасня 1928 г.
Судовы орган: ОСО
Прысуд: 3 гады ППЛ, адбыўшы: Вяцкай губ.
Дата рэабілітацыі 20 ліпеня 1992 г.
Рэабіліт. орган: Пракуратура
Архіўная справа: КДБ РБ — 34229-с
Крыніцы дадзеных: БД «Ахвяры палітычнага тэрору ў СССР»; Беларускі «Мэмарыял».
Марыя Вальковіч, 1892 г.н., вучылася ў Маскве, але ў 1919 годзе, пабачыўшы зверствы бальшавікоў, цяжка захварэла на нервовы разлад, вярнулася ў Белае Балота і на 27-м годзе памерла.
Іосіф Вальковіч, быў расстраляны
Дата нараджэння: 1890 г.
Месца нараджэння: Мінская вобл., в. Белае Балота
Пол: мужчына
Нацыянальнасьць: беларус
Прафесія/месца працы: бляхар
Месца пражывання: Прыіск «Сафійскі» ДВК.
Дата арышту: 11 лютага 1933 г.
Абвінавачванне: ст.
Асуджаны: 5 жніўня 1933 г.
Судовы орган: Тройка пры ПП АГПУ па ДВК
Артыкул: 58, п. 10, 58, п. 11 КК РСФСР
Прысуд: 3 гады ППЛ
Дата рэабілітацыі 22 красавіка 1960 г.
Рэабіліт орган: Па пастанове Прэзідыума Хабараўскага краявога суда
Падставы рэабілітацыі: за адсутнасцю складу злачынства.
Архіўная справа: П-86272
Крыніцы дадзеных: БД «Ахвяры палітычнага тэрору ў СССР»; Кніга памяці Хабараўскага края.
А на фота — не мой прадзед Мікола, нават фотаздымка не засталося ад гэтага працавітага, годнага ва ўсіх сэнсах чалавека. Гэта яго дзеці, дзеці ворага народа, мой дзед Андрэй і яго сястра Таня. Што выпала на іх сіроцкія стаптаныя лёсы — гэта асобная гісторыя…
Я аб тым, як жахліва абышліся з нашай сям'ёй, як люта. І аб тым, што трэба аб гэтым казаць. Не варта крычаць, бо мы ў вялікай небяспецы. І нашыя дзеці. Бо гэтыя шарыкавы з маўзерамі ўжо на парозе нашых утульных дамоў. І яшчэ я аб тым, як нехта ўжо хоча ўчыніць новы гвалт — ужо над сваякамі забойцаў. Гэта жах. Я не хачу гэтага вар'яцтва.
