Галава Леніна з халадца экспануецца на выставе «Другое пакаленне ёсць другая прастора. Час жанчын» музеі «Віцебскі цэнтр сучаснага мастацтва». Экспанат не прастаяў і трох дзён, як кіраўніцтва цэнтра прыняло рашэнне зняць яго з выставы.
«Дрэнна, калі ў грамадстве не разумеюць іроніі», - пракаментавала рашэнне аўтар інсталяцыі віцебская мастачка Анастасія Ганчарова. — «Гэта была не палітычная акцыя, проста постмадэрнісцкая канцэпцыя. Рашэнне зняць аб'ект з экспазіцыі — не больш, чым нечыя страхі».
Разам з галавой Ільіча ў «Віцебскім цэнтры сучаснага мастацтва» дэмантуюць яшчэ каля 20 работ 9 аўтараў: мастакі вырашылі падтрымаць Анастасію Ганчарову.
Выстава адкрылася 1 лістапада, экспазіцыю планавалі паказваць да сярэдзіны снежня.
Інсталяцыя, якая выклікала рэзананс, называецца «12 нажоў у спіну рэвалюцыі»: на талерцы стаіць галава правадыра рэвалюцыі, зробленая з халадца, а зверху - вяроўкі і чырвоныя анучы. Анастасія Ганчарова стварыла гэты аб'ект у суаўтарстве з Паўлам Юрковым.
Спачатку побач з талеркай ляжаў нож. Потым падчас выставы яго вырашылі усадзіць у галаву Ільіча.
— Артэфакт звараны са звычайнага свінога халадца з дадаткамі — морква, спецыі. Гэта ядома, але нясмачна: спалучэнне перчанага, тлустага, жэлацінавага, не абышлося і без будматэрыяльных прымешак і сілікону, - тлумачыць Ганчарова. - Таму адчуванне гідкае. Анучы — алюзіі на падраныя чырвоныя сцягі і крывавыя патокі: усё тое, што адбывалася пасля 1917 года. Ужо шмат гадоў для ўсіх нас не сакрэт, што за чалавек быў Ленін і чым для многіх стала рэвалюцыя.
