05.11.2017 / 20:47

Літоўка Ванагайце папрасіла прабачэння за паклёп на партызана 24

Новы паварот у інтэлектуальнай палеміцы ў суседняй Літве. Пісьменніца Рута Ванагайце папрасіла прабачэння за свае выказванні на адрас кіраўніка літоўскіх «лясных братоў» Адалфаса Раманаўскаса-Ванагаса.

Раманаўскас-Ванагас (Ванагас па-літоўску значыць ястраб) у Літве шануецца як герой і як пакутнік. Настаўнік Раманаўскас не прызнаў акупацыі Літвы саветамі. Калі рускія паспрабавалі прымусіць яго працаваць на іх, ён сышоў у партызаны. Ён вырас у кіраўнікі падполля Паўднёвай Літвы і пратрымаўся да 1956 года. 

Пры арышце саветы дзіка катавалі яго. У бальніцу яго даставілі з выбраным вокам і адрэзанымі яйцамі. Тым не менш, у афіцыйных паперах гэта праходзіла як «спроба самагубства».

Менавіта заява, што Раманаўскас ніякі не герой, а чалавек, датычны да Халакосту, агент КГБ і самагубца-неўдах, выклікала вялікае абурэнне ў Літве. Экс-кіраўнік Літвы Вітаўтас Ландсбергіс прапанаваў Ванагайце пайсці ў лес і пакаяцца. А выдавецтва літаратаркі вырашыла адмовіцца ад супрацы з ёй і знішчыць тыражы.

Гісторыкі з дакументамі на руках даказалі, што няма ніякіх доказаў саўдзелу Раманаўскаса ў генацыдзе, што ён нічога не выдаў КГБ як агент і што пры спробе самагубства чалавек не рэжа сам сабе палавых органаў.

Ванагайце зрабіла сабе імя на выкрыцці суўдзелу літоўцаў, у тым ліку і будучых «лясных братоў», у вынішчэнні яўрэяў. Аднак яе кнігі і стыль яе выступаў шмат каго ў Літве раздражняе.

Пасля скандалу вакол Раманаўскаса-Ванагаса пісьменніца выступіла з пакаяльнай заявай.

«Я не хацела скандалу. Не хацела прычыніць боль дачцэ партызанскага камандзіра і памяці яе бацькі. Яна пацярпела больш, чым можна сабе ўявіць. Я не хацела страціць свой спакой і спакой маёй сям’і. Не хацела страціць усе мае кнігі. Страціла, — перакладае яе заяву Радыё «Свабода». — Узрушылі мяне і факты, якія сёння ў сваім інтэрв'ю адкрыў грамадскасці гісторык Д.Юодзіс, які дэтальна даследаваў дакументы. Я сапраўды пра іх не ведала: ні пра дачыненні партызанскага камандзіра з КГБ і ягоныя матывы, ні пра жахлівыя і працяглыя яго катаванні. Сёньня я адкрыта прызнаю, што выказанае мною меркаванне пра тое, што Адалфас Раманаўскас-Ванагас не быў катаваны, а нанёс сабе пашкоджанні сам, было цалкам памылковае, яно грунтавалася на зафіксаванай у справах хлусьні, мэтай якое было схаваць сляды катаванняў.

Я вельмі шкадую з прычыны сваіх паспешлівых і пыхлівых каментароў у публічнай прасторы», — заявіла Ванагайце.

СГ

19
Нямір / Адказаць
05.11.2017 / 21:03
Літоўка- гэта  тып касы.  Яна бывае  5,6,7 -ручнаю... А пані  Ванагайце  , хутчэй,  летувіска, ці жмудзінка.
5
Пурыст / Адказаць
05.11.2017 / 21:25
Яе прозвішча - Шулячыха, а яго - Шуляк. Ястребов - па руску. І падобна на тое, што яна чытае толькі прысуды, і, мо, абгрунтавальную частку.
12
Танчык / Адказаць
05.11.2017 / 21:32
Можна толькі паважаць чалавека за моц прылюдна прызнаваць свае памылкі. Некаторыя на гэта наогул не здольныя.
Паказаць усе каментары/ 24 /
Каб пакінуць каментар, калі ласка, актывуйце JavaScript у наладах свайго браўзеру