Адзін з экспанатаў выставы «Час жанчын» — бюст Леніна у выглядзе халадца, які быў асновай інсталяцыі «12 нажоў у спіну рэвалюцыі» Настассі Ганчаровай — пакінуў выставачную залу Цэнтра сучаснага мастацтва. Экспазіцыя, аўтарамі якой былі дзевяць віцебскіх мастачак, пратрымалася крыху больш за суткі.
Як заявіла начальнік аддзела ідэалагічнай работы, культуры і па справах моладзі Віцебскага гарвыканкама Наталля Шыёнак, гэта выставачная зала, размешчаная на плошчы Перамогі непадалёк ад вечнага агню — не месца для падобных творчых эксперыментаў. Чыноўнік лічыць, што халадзец у выглядзе ленінскай галавы побач з патрыятычнымі сімваламі можа быць няслушна вытлумачаны.
У той жа час Анастасія Ганчарова кажа, што ніякіх скаргаў на яе працу ад «ветэранаў з ўнукамі» не паступала.
Напярэдадні 100-годдзя Кастрычніцкага перавароту Ленін падарожнічаў па Віцебску ў скрынцы з-пад абутку. Настасся Ганчарова пранесла 700-грамовую скульптуру правадыра ад плошчы Перамогі да плошчы Леніна.