Некалькі расійскіх лыжнікаў рашэннем камісіі МАК прызналі вінаватымі ў парушэнні антыдопінгавых правілаў.
Сярод дыскваліфікаваных Максім Вылягжанін. Ён фінішаваў на другім месцы ў гонцы на 50 кіламетраў. Першае месца было ў Аляксандра Лягкова, аднак яго пазбавілі медаля за допінг яшчэ раней.
Цяпер алімпійскім чэмпіёнам стане яшчэ адзін расіянін — Ілля Чарнавусаў, — які паказаў у марафоне трэці вынік. Срэбра дастанецца Марціну Ёнсруду Сундбю (Нарвегія), а вось бронза — Сяргею Далідовічу, які ў лютым 2014 года фінішаваў пятым.
«Шмат хто просіць пракаментаваць адхіленне расійскіх лыжнікаў — без каментароў. Але калі сустрэнуся з імі, руку пацісну. Паважаю!» — напісаў у фэйсбуку Сяргей Далідовіч.
Дарэчы для Сяргея Далідовіча гэта будзе першы алімпійскі медаль увогуле.
***
Нагадаем, што 44-гадовы Сяргей Далідовіч улетку сабраў 100% неабходнай сумы (30 тыс. рублёў) для ўдзелу ў Алімпіяды-2018 у Паўднёвай Карэі. Для спартоўца гэта будуць сёмыя Гульні, у алімпіядах ён бярэ ўдзел ад 1994 года.
Але за некалькі месяцаў да Алімпіяды Сяргей дазнаўся, што не мае магчымасці трэніравацца з нацыянальнай зборнай. «У нейкі момант нехта палічыў, што Далідовіч занадта стары для таго, каб заставацца найлепшым лыжнікам Беларусі. Мне здаецца, гэта несправядліва, калі мая галоўная віна — узрост. Гатовы даказаць на лыжні, што менавіта я варты прадстаўляць краіну на Алімпіядзе 2018», — напісаў тады лыжнік, абвясціўшы збор грошай. Неабходныя 30 тысяч Сяргей сабраў за некалькі тыдняў.
Такім чынам, на Алімпіядзе-2014 у беларусаў сем медалёў: пяць залатых (Домрачава — 3, Кушнір, Цупер) і два бронзавыя (Скардзіна, Далідовіч).
